Boxing India nung T.Meren Paul Tir kümogo

Dimapur, November 07 (TYO): Nagaland nung saisapong maparen nung temulung agüja tenzüker aser taoba Nagaland Transport Commissioner, Wb.T.Meren Paul, Boxing India nung Acting President asütsü shimtetba asoshi kanga pelar aser pa nem tenüngsang agütsür ta tanü sangdong ka ajanga Akhoya Nunger Bendanglir Reju (ANBR) teloki metetdaktsüogo.
Nagaland nung pa ama saisapong maparen tajungba küma renlokdaktsütsü asoshi bendanga agüja inyakba mapa reprangteta, iba menden aser mapa ya nisung shitak ka nem agütsüogo ta ANBR telokisa metetdaktsü.
Pa ya tang Nagaland Olympic Association nung tongti zülur lir aser Indian Olympic Association, North East Commission nunga züngsem lir.
Pa lenisüba nung linük nung saisapong maparen ketdangsertem rongnung tangatettep tajungba küma inyaktsü aser saisapong jangrar lanurtemi aginüba nükjidong tongteta inyaktettsü tamang tulu lir ta ANBR telokisa metetdaktsü.
Pa mapa nung takok ngua inyaktettsü asoshi Tsüngremi pa nem shisatsü aser anema aliba taküm moajang ta ANBR telokisa sarasadema metetdaktsü.