Boyzone teloki tang tatemsa kenten sentong agitsü

Washington: July 10 (Agencies): Alima nung tebur temeja kentener telok rongnung kanga nüngtugu, Boyzone-i küm 26 tashi kentena aruba sülen tang tatemsa kenten sentong nung shilem agitsü.
Ireland linük nungi Boyzone-i parnok indang kensep 7buba aser tatemsabuba adokba sülen tang tatemsa ‘Thank You and Goodnight Tour’ agir.
Iba telok nung züngsemtemji Keith Duffy, Michael Graham, Ronan Keating aser Shane Lynch nunger lir, aser parnoki tan alima sema kentena senzüba sentong ya parnok indang kentenba putiotsü nung tatembangbuba asütsü.
Osangbener den jembidang Ronan Keating-i, “Onok sapurtem den tesendakatep ya jangratemtsüka lir. parnoki mapang ajak nung onok nungiter,” ta ashi.
Dublin nungi tenzüka parnoki alima tesem balala sema kentena senzütsü aser K-Pop telok BTS nema shilem agidaktsütsü jangrar.
“Boyzone aser BTS nati shilem agibaji jangratemtsüka asütsü. BTS teklok ya kanga junger,” ta Keating-i ashi.
Iba telok nung ano tanga züngsem ka, Stephen Gately bo 2009 küm süogo.
Boyzone indang tatembangbuba tour ya yaküm June 29 nung tenzük aser taküm October 25 nü tembangtsü.