BPCC(A-N)-i Border Goodwill senden amen

Dimapur, December 22 (TYO): Hokolbarnü Darikial yimtsüng, Nakachari nung Border Peace Coordination Committee (Assam-Nagaland) BPCC(A-N)-i Peace Goodwill senden ka ayonga amen.
Naga yimten tebilemtsü atema India sorkari telemtetba ka agitsü ta osang jembiba ajanga nisungtem nem terata aser tetsübu bener aruba atema tanü senden nung tebilembatem lemsatepdang, telok anapronglai iba osang ya nisung kari yimjung tensa raksatsütsü atema jembiba onük ka dang lir ta angajemba metetdaktsü.
Wokha district kübok Changpang sector aser Assam kübok Titabar Sub-division nungi yimtsüngtem tsüngda 2003 nungi Friendly Volleyball Tournament asayayonga arur aser taküm-a December 18, 2017 nü takok ngua tembang. Iba asayamung nung Naga aser Assamese nungeri shilem agi aser onoki Naga nunger den timtem kecha melii liyonga arur, ta Medeluajan nungi BPCC(A-N) executive member, Pabon Gogoi-i ashi.
Ano, Mokokchung district kübok Aosenden nungi Likok Ao-i ashiba agi, Assam nungi media ajanga osang meyipsar belenshir aser tiyazü teimba asür.
Assam nungi takotet media nisungtem Mrinal Talukdar aser Atanu Phukan nati BPCC(A-N) züngsemtem dang ashiba agi, India sorkari North East State tem indang litsü nung mekongshii Naga Peace accord tatem küma latettsüla aser ibaji Prime Minister o Home Minister nati shiogo.
Iba ama tensa ka nung BPCC(A-N)-i Nagaland aser Assam tsütsü alir ajaki yimjung nung alitsü aser arrtsülen alirtemi osang tiyazü ajanga mashilen manidaktsütsü atema kanga kümdanga alitsü metetdaktsüogo.
Tanü senden nung mendenji BPCC(A-N) president B. P. Bora liasü, Coordinator BPCC(A-N) Er. Temsu Wathi Ao-i okila jembi aser Assam Valley Baptist Mission Evangelist Huni Gogoi-i temoatsü meshia sarasadem.