BPCC(A-N)-i Rankham-Yajang mangatettep atema yimjung yanglutsü meranger

Nakachari, November 29 (TYO): Jorhat district kübok Darikial yimtsüng nung BPCC(A-N) pur rongdak senden ka nung GBs, Village council züngsemtem aser nisung kar jaoka agiogo.
Iba senden nung BPCC(A-N)-i Titabar sub division kübok Medeluajan sector semdangba aser Bhandari sub division kübok Mithihe sector semdangba onük benoka o lemtep.
Senden nungsa Jorhat district kübok Rankham yimtsüng aser Mokokchung district kübok Yajang-C yimtsüng tsüngda mangatettep adoka aliba indang onük benoka lemsatepdang, yim anaprong nungi lennirtemi tensa tang tajungba lir aser mangatettep aliba onükji tajungleni angatetteptsü ta telok tsüngdang nangzük. Parnokisa iba onük atema BPCC(A-N)-i tiyongtsü nung yariteptsü asüngdanga liasü.
November 20, 2015 aonung mejangjatetba nisung kari Morongial Natunmati yimer Hopunti Mazhi aser Subhas Gowalla na pur aoba indang onük benoka jembidang, BPCC(A-N)-i tena nem senotsü teyari agütsütsü, ta metetdaktsü.
Senden nung tena dang asüngdangya asüba mapang iba tatalokbaji Assam-Nagaland arrtsü atema masü saka tanga onük ka atema adokba liasü ta angazük. Iba mapa ya lokti nung nisung kari arrtsü onük ajungmesotsü atema inyakba liasü ta senden nung adenertemi meteta aru.
Senden nungsa December 17-19, 2015 tashi Bhandari sub-division kübok Mithihe yimtsüng nung ‘trans border friendly volleyball match’ alitsü indang osang metetdaktsü. Iba asayamung nung BPCC(A-N)-i tongti shilem agitsü aser maneni Assam aser Nagaland nunger tsüngda temeim aser tesentaktep alitsü atema sentongtem ayongzüka agitsü.
Mithihe nung asayamung aliba mapang BPCC(A-N)-isa arrtsülen alirtem atema free eye camp ka ayongzüka akatsü sentong lir.