BR Ambedkar kerak yanglua ana raksatsü

Lucknow, Rongchii 12 (Agencies): Uttar Pradesh nung kerak yanglutem raksatsüba maneni kanga tashi ita odar aser maneni Yangtepnüa BR Ambedkar indang kerak yanglu ana tashi raksatsüogo. Kerak yanglu ana ya ka Firozabad nung aser ka Barabanki district nung raksatsü.
CM Yogi Adityanath-i kerak yanglutem kümzüka ayutsüba atema ozüng tesashi agüja liaka Ambedkar indang kerak yanglu raksatsüba ken o nung tang tashi nisung ka danga pua mali. Firozabad kübok Nagla Jhamman yimtsüng nung ozüng raksartemi kerak yanglua ya raksatsüba sülen tensa mejungi aküm ajisüaka police ketdangsertemi oa tensa azüokba sülen tang tajungba lir, ta osang ajanga metetdaktsü.
Kasa mapang nung local temi ashiba agi, Barabanki, Fatehpur Tehsil kübok Mohammadpur Khala tesem nung aliba kerak yanglu ya police temi raksatsü.
Parnoki ashiba agi, parnok Rongchii (April) 14 nü Ambedkar Jayanti benjungmung atema renemshia aliba mapang nung local police chowki nungi constable ana iba tesemi arua yimdaklirtem aridok. Iba sülen mapang tatsüka lir yimdaklirtem iba tesemi meyipa aruba mapang nung Ambedkar indang kerak yanglu nung teka sükdanger lia ngutet. Ajisüaka police temi iba tatalokba ya ozüng raksartem dak tongloktsüogo.
Iba tesem nung aliba nüburtemi locals BJP züngsem Shivkumar Maurya, Jaipal Maurya, Ram Vijay Mishra aser Dinesh Maurya nunger aputsüba atema khangogo. Parnoki ashiba agi, kerak yanglu raksaba nung parnok ya densema lir aser parnok ya tangsa tang aputsü nüngdaker. Maneni yimdaklirtemi lenmang mokdanga longkak aitba sentong ka ayongzüka kaogo.
Osangbenertem den sensaksemba mapang nung ASP Barabanki, Digambar Kushwaha-i ashiba agi, “iba yimtsüng nung Ambedkar indang kerak yanglu raksatsüba osang ya onok nem agüja liasü. Yimdaklirtemi ashiba agi, par yimtsüng nungisa nisung kari iba maparen ya inyak. Iba dak sendakba nung ken o ka benokogo aser takaratiba nung bentettsü. Iba tatalokba nung police kar danga densema lira parnok anema jenjang tapet agitsü.”