Brad Pitt-i shiruru aoksatsü ta aitsü

September 24, 2015: Tang Brad Pitt-i produce asüba film tangokba mapang pai farm nung aliba shirurutem aoksatsür ta tai tonglokja lir.
Arishi küm 51 tain, Brad Pitt-i produce asüba ‘The Lost City of Z’ film Northern Ireland nung aliba Ballygally yimtsüng nung, tetangokdak lir aser iba mapang film tangokdang amshiba tapoktsü tem ajanga iba anasa aliba an, nashi, chang aser kor tem kanga aoksatsür.
Iba tesem nung alir aluyimer Jason McKillion-i, “Iba ya taoba Hombar nü nungi tenzük. Tapoktsü tila apokba ola aser prangpong olatemji Hombar nü nungi tenzük aser tapoktsü tulu apokbaji Mongolbar nü nungi tenzük,” ta Larne Times osangkaket ajanga metetdaktsü.
“Item tapoktsü apokdang ki aser kijiba kanga mejungi anokshitsür aser iba aongmedangji tenemtsüng tashi aor. Ozü kidangersanger kor alu nung aliba iba ola tulu angashia kanga aoksaa jokzümeso. Bodhbar nüa ano tapoktsü ka apokdang ozü kidang aliba shirurutema kanga aoksatep. An pusatepa den külemi ozü azüa kanga atentena asangmeso,” ta paisa ashi.
Jason-i, “Iba dak alia ano ozü kidangersangerbo Sienna Miller, Robert Pattinson aser Charlie Hunnam nungeri shilem agiba film tangokba ola jagi kanga mesademdaktsür,” ta ashi.
‘The Lost City of Z’ film ya Britain nunger alima sema jajar, Percy Fawcett, Amazon-i alemli sobaliba bushiyonga aoba otsü lir aser iba film ya 2016 küm sayatsü.