Brad Pitt-i tanurtem reprangtsü ken o benok

November 06, 2016: Brad Pitt aser Angelina Jolie na balatsü atema sashia jembiba mapang ka nung Jolie-i tanur trokprongla lai kijai reprangtsü benoka aliba anema Hokolbarnü Brad-ia ken o ka benokogo.
Brad Pitt-i Angelina den külemi seneper tanur reprangtsü atema tan hopta tatemlen benokogo.
Angelina Jolie-i kinungbu tena balatsü atema benokba den külemi tanur ajakji lai dang reprangtsü benoka liasü, aser ibaji anema arsihi küm 52 actor, Brad-i Hokolbarnü (November 4) California nung aliba Superior Court nung tanurji tenapronglai reprangtsü benok.
September ita nung Jolie-i tena balatsü atema benokba ajanga nisung jenti aoksa aser iba mapang nungsa lai tena chir- Maddox (15), Pax (12), Zahara (11), Shiloh (10) aser arishi küm 8 jakrep Knox aser Vivienne nunger ajak lai dang reprangtsü mepishia liasü.
Laisa Pitt-i tanurtem semdangtsü dang akok, ta ashi.
Tang mezüng Pitt-i balatsü dak sentakba nung official document agüja paia tanurtem reprangtsü atema mepishiogo.
Tena pilaba mapang nungi tan agi hopta trok tashi tanur ajak la den lir aser lai dang repranga arudar.
Osang ka ajanga ashiba agi, “Lai mapa ajak thinentsüogo. La anogo shia kidang dang alir, parnok anepalur, homework nung yariteper,” ta ashi.
Kasa osang ajanga “Brad aser Angie na tongtepratep masür, aser ajakji tena atema inyaktsürtemi dang inyaker. Iba ya tensa tamajung ka lir,” ta ashi.