Brad Pitt par tanur den ghonda pezü dang ajurutsü melar

December 18, 2016 (Agencies): Hollywood nung nüngtyugu actor Brad Pitt-i Christmas mapang par tanurtem den ajurutsü ghonda pezü dang melar. Pai tanur nem sempet agütsütsü asoshi anepdang mesüra nikongdang ajurutsü asoshi pa taoba tebutsü Angelina Jolie-i melaogo.
“Pitt-i benjung mapang par tanur ajurutsü nokdangtsü asoshi la dak iba molungjang mali aser lai aji memulungra parnoki la tang kodanga tai matoktsü. Saka Pitt-i pa indang acting sempet tajungtiba amshia par tanur den mapang tatsüka intoktsü,” ta par kibong den tesentaktep tajung alir nisung kari ashi.
Küm 41 tain Jolie ya Malibu tesem nung tzüküm anasa ta agüja aliba ki ka nung lar tanur Maddox, 15, Pax, 13, Zahara, 11, Shiloh, 10, aser küm 8 tain jakrep Knox aser Vivienne nunger den lidar. Jolie aser küm 52 tain Pitt-na tanur ayutsü asoshi tang court nung jembiba mapang ka lir. Shisatsü nung ka küma longjemtsü makokba ajanga Jolie-i tena balatsü asoshi court nung ken o benoka liasü aser tanurtem ajak la meyong asütsü asoshi tang takhangba agüja lir, saka Pitt indang lawyer temia kasa takhangba agüja lir.
Family Service ajanga Brad Pitt tanur 5 tem den majurutepdang, mit madoktsü asoshi counseling agitsü aser mozü achiba tendanger agütsütsü shia liasü. “Thanksgiving mapang Pitt-i tanurtem den ajuruteptsü asoshi kanga mepishia liasü saka memela,” ta osang ajanga ashi.
“Pai par tanurtem ajurutsü kanga yongyar, saka pai tanur den ghonda pezü dang külemi kazür toktsütsü asoshi kanga shisabulur,” ta osang ajangasa shisem.
Tesüiba küm par kibong Christman benjong Thailand nung Phuket tesem nung room ter aliba ki ka nung munga liasü.