Brain Tumour nokdangtsü mozü ngutetogo

New York, Nov. 14 (Agencies): Bushisüngdangertemi ‘glioblastoma’ (Brain Tumour) tashi mait kümdakja iba tashidak inyakyim anüa kümdangtsütsü asoshi mozü ka ngutetogo. Iba cancer ya cancer ajak danga tamajungba lir ta züngshir.
Iba mozüji propentofylline (PPF) lir aser iba yagi TROY ta ajaba protein ka dak rangloker inyaker.
Iba mozü ya ajanga ‘chemotherapy’ mapang amshiba mozü, temozolomide (TMZ) aser radiation tali tashi taitba inyakdaktsüba ajanga glioblastoma kanga junga anepalutetter.
“PPF agi glioblastoma indang cell nung aliba TROY ajema kümdaktsür, glioma cell jakshia aoba anendaktsür aser tekolok cancer TMZ aser radiation agi yaridang tajangzük tajungba agütsüba onoki putetogo,” ta Phoenix, US nung aliba Translational Genomics Research Institute (Tgen) nungi iba bushisüngdang nung tezülur Nhan Tran-i ashi.
“PPF ya TMZ aser radiation na den lokteper inyakba ajanga glioblastoma tashidak tuluba küma aoba nungi nokdanger aser ibaji ajanga tekolok nung tumour alirtem temelenshi tajungba angutsü,” ta Tran-i ashi.
Tang aliba inyakyim ajak agi, glioblastoma alirtem dak nungi tekolok nung tumour aliba rangteta entokba ya lir. Aji oda süaka glioblastomas ajanga tekolok tesem ajak kanga mejungi süngadoker aliba ajanga tumour ajak entoktsüji kanga dang tasak aser ibaji ajanga cancer tashidakji tanaben meyipa arur.
Iba cancer ya ajanga chemotherapy mozü aser radiation therapy ajak nokdanger.
PPF yagi TROY protein tashi mait kümdaktsüba ajanga glioblastomas-i junga aliba tekolok nung medangshir aser ibaji ajanga tumour ji prokshia maor.
Cancer mozütemi tekolok nung aliba tzü (fluid) aser azü na majurutepdaktsüba arrtsü adena meyitetba ajanga tashidak mozü agi yaritsü kanga tebilemtsü tulu lir.
Iba arrtsü yagi tekolok-i tanga mozü tamajung aiba nokdanger. Aji süaka iba arrtsü ya tekolok kümzüka ayuba tsütsü kanga tashi tait asüba ajanga taküm kümzüktsü mozü dena nokdanger.
“Aji oda süaka kanga junga tendangba sülen PPF yagibo iba arrtsü adena ia tashidak nung teyari agütsür saka tanga timtem mokoktettsüsabo magütsür ta ngutetogo” ta Tran-i ashi.
Iba tongotetba ya Neuro-Oncology kaket nung adoktsüogo.