Brazil-i FIFA Under-17 World Cup kokogo

Brasilia, Yimpoksüi/November 18 (Agencies): Deobarnü Under-17 World Cup final asaya nung Brazil team-i tesülen nungi atur goal 2-1 agi Mexico madak takok nguogo. Parnoki iba asayamung pezüben kokogo.
Anogo asem tejakdang semifinal asaya nunga goal 2-0 agi asaya mekoki aliba nungi meyipa arur goal 3-2 agi France akokba sülen final nunga asaya tatemtsü minute 10 anunga lir Brazil team-i goal ana idakja parnoki takok marok angu.
Asaya tetenzüklen Brazil-i goal idaktsütsü asoshi maongka timba angu saka minute 66buba nung Mexico nungi asayar Bryan Gonzalez-i goal ka idakja parnok tejakdang aküm.
Asaya atemtsü minute 6 anunga lia Veron alangdaktsüba sülen Video Assistant Referee (VAR)-i asaya ketdangsertem dang asaya anener asadangshitsü atema ajungshiba sülen Kaio Jorge-i penalty spot nungi goal ka idakja goal kasasa aküm.
Iba sülen mapang apuloktsür asayaba mapang substitute Lazaro-i Brazil atema tanabuba goal idakja parnoki asaya akok.
Brehostibarnü France akokba asaya nunga Flamengo forward ya substitute ka ama aita goal tasembuba idakja liasü.
“Parnoki parnok mulungka nung VAR amshir. VAR-i telemtetba magütsü tashi onoki asaya azüoka asayaa liasü. Iba sülen parnok tashitaitba aküm,” ta Mexican coach Marco Ruiz-i ashi.
Brazil asoshi iba asaya akokba ya manga ayangba asaya ka ama liasü, shirnok 2005 küm under-17 final nung Mexico-i goal 3-0 agi akok aser 2012 Olympics nunga final nung mexico-i Brazil under-23 team tsükdaktsü.
Tasembuba jenjang asoshi asaya nung Arnaud Kalimuendo-Muinga-i hat trick idakja France-i goal 3-1 agi Netherlands kokogo.
Netherlands nungi asayar Sontje Hansen-i asayamung peyong nung goal trok idakja golden boot award angu.