Brazil-i goal 2-0 agi Argentina koka final tongogo

Belo Horizonte, Chiteni/July 3 (Agencies): Mongolbarnü Gabriel Jesus aser Roberto Firmino nati goal kaka idakja Brazil puri Argentina 2-0 agi kokogo aser parnok Copa America final-i iogo.
Asaya nung Argentina puria goal idaktsütsü asoshi maongka angu saka Sergio Aguero aser Lionel Messi nati metsüba ball goal post nung odaker adok.
Bodhbarnü Chile aser Peru na asayaba sülen takoker den Deobarnü Brazil final asayatsü.
2007 Copa final nung Brazil-i goal 3-0 agi Argentina akokba sülen tang mezüngbuba asayamung tongtibang ka nung linük ana ajurutepogo.
EPL nung asayaba asayar ana; Jesus aser Firmino nati iba asaya nung tongtibang shilem agiogo ajisüaka mezüngbuba goal idaktsüba nungbo captain Dani Alves-i shilem tulu agia liasü.
Argentina pur tamakok anguba sülen Messi-i linük nungi tongtibang asayamung ka koknüa aliba timla samaogo.
Ajisüaka taruba küm Argentina aser Colombia nung Copa America asaya nung maneni asayamung tongtibang ka koktettsü asoshi pa nem maongka agütsütsü.
Asaya kanga toktepa asayatsü imlaa liasü aser yamaji asaya tetenzüklen asayartemi mekümdangi tackle asüba nguogo aser Jesus alangdaktsüba atema Argentina nunger asayar Nicolas Tagliafico nem mezüngbuba card agüja liasü.
Asaya metenzük tsüngda ground ya aremshiruru kari ajemsatsü ama liasü aser yamaji telok anapronglai ball kanga junga azüoka masayatet.
Asaya nung goal idaktsütsü asoshi mezüngbuba maongka ya Argentina nungeri ngutet saka Leandro Paredes-i yard 30 nungi metsüba ball goalkeeper Alisson indang goal adena oadok.
Iba sülen minute 19buba nung Brazil puri mezüngbuba goal idaktsü. Alves-i asayar asem tashi paitoka ball bener lur Firmino nem ball agütsü koba pai ano Jesus nem agüja goal idaktsü.
Asaya mezüngbuba shilem matem tsüngda Argentina puri iba goal küptokteter lila saka Messi-i metsüba free-kick ka Aguero-i goal tejakdang post nung tongoktsü.
Iba sülen Messi-i ball kanga junga bener lua Brazil defense teyongtsü nung Aguero nung ball agütsü saka pai metsüba ball ya Marquinhos-i kanga kara arua nokdang.
Mapang tatsüka lir Messi-sa tachichilen nungi nisung ana paitok aser ball pa tetsüng nungi pilaa aoba ajua orr kanga junga rakzük saka pai ball tezüleni metsüdok.
Kasa mapang nung Argentina nunger goal nung Arthur-i ball tashi agi metsüloktsü saka goalkeeper Franco Armani dangi ball indang indanga ao.
Asaya tanabuba shilem nung Argentina puri Brazil pur kanga nongshia liasü aser Aguero-i box telung nung Lautaro Martinez nem ball tajung ka agütsü saka pai metsüba ball Alisson-i ayong ayonga apu.
Kasa mapang nung Brazil pur asoshi Jesus-i Philippe Coutinho nem ball tajung ka agütsü saka pai ball tezüleni metsüdok.
Mapang tatsüka lir Martinez-i Messi nem ball tajung ka agütsü saka pai metsüba ball post nung ondaker adok.
Minute 66buba nung Messi-i free kick tajung ka metsü saka Alisson kümküma aliba ajanga ball ayong ayonga ajepzük.
Iba mapang tashi nungbo Argentina coach Lionel Scaloni mesüngjemteti aküm aser pai midfielder Marcos Acuna aniteter winger Angel Di Maria yok.
Argentina puri goal idaktsütsü imlaa aliba mapang ka nung Brazil puri counter-attack asüba mapang minute 71buba nung Liverpool striker Firmino-i parnok asoshi tanabuba goal idakja liasü.
Maneni Scaloni-i forward Paulo Dybala yok saka parnok asoshi timla maliasü.