Brazil-i Volkswagen dang sen million dollar 13.1 senchi achi

Brasilia, November, 14 (Agencies): Germany nung gari yanglur company Volkswagen-i, parnoi yangluba garitem nung latetja aliba dak mokozü tali adokba meputettsü asoshi software ka enoka yangluba ajanga ‘Brazilian Institute of the Environment & Renewable Natural Resources (Ibama)’-i parnok dang sen million 13.1 (50 million reais) senchi chiogo, ta sorkari Brihostibarnü metetdaktsü.
Brazil nung amshitettsü asoshi item gari yanglushitsü atema sentong ka meshia Ibama-i Brihostibarnü Volkswagen dang metetdaktsüogo, ta Xinhua news agency-i ashi.
Ozüng alema yangluba gariji 2009 aser 2015 tsüngda yangluba cylinder pezü keta aliba Volkswagen diesel gari tem lir. Iba gari nungi ozüngi latetja aliba dang nungi mokozü tali adokba meputettsü asoshi software tila ka enoka lir.
Iba gari ya ozüngi melaba ama amshitettsü asoshi engine tanga kecha melenshitsü menüngdaker saka iba software tila kaji melentsüba dang lir.
September 18, 2015 nü US Environmental Protection Agency (EPA) ajanga Volkswagen indang AG, Audi AG aser Volkswagen Group of America-i linük tzü-mopung alema inyakogo, ta sangdonga liasü.
US sorkar dang langzüba ama Volkswagen-i Brazil danga telangzüba agütsütsü nüngdaktsü. Parnoki iba gari yangluba aser Brazil nung ayokba osang tejangja Brazil sorkar nem agütsütsüsa akümtsü.
Tang tashi nung Volkswagen-i 2011 aser 2012 nung yangluba gari, ‘Amarok’ tarensen nunga iba ozüngi memelaba software enoka lir, ta US nung putetogo.
Brazil nung ‘Environmental Crimes Law’ ajanga senchi timtiba achitsü melabaji sen million 13.1 ya lir.