Brazil nung tzü nokdang ka chirep

Brumadinho, Aenjeti/January 26 (Agencues): Southeast Brazil kübok mine ka nung tzünokdang ka chirepba sülen nisung 300 shi samara bushidar aser parnok teku tashi süogo. Local governor-i ashiba agi, parnok ya taküm angutsü kangabo mimlar.
Iba lendong atalokba sülen Hokolbarnü tasümang tenetbo ngutetogo. Minas Gerias state kübok Belo Horizonte yimti anasa iron-ore mine ya nikongtsütsü 1:00 shi nung chirepba liasü.
Honibarnü anepdang tashi nung asür parnok teku kümogo aser nisung 300 shi samara mangur.
Nisung samara bushir parnok 150 bo company indang administrative office tem nung inyaka liasü, koba tzünokdang anasa liasü, ta tekümzükertemi ashi.
Iba mine ya Vale meyong lir aser 2015 küma kasa state nung mine ka chirepa nisung 19 tashi süogo.
Minas Gerais governor Romeu Zema-i ashiba agi, samara alirtem kümzüktsü asoshi takok tashi inyakdar saka parnok taküm kümzüktsü kangabo mimlar aser tasümang ang ngutettsü akok.
Pa indang regional administration ajanga ashiba agi, tzünokdang chirepba mapang nung Vale mine nung nisung 427 inyaka liasü aser parnok 279 taküm kümzükogo aser tanungba nisungtem samara bushidar.
Tzünokdang pokdanger lishitzü Brumadinho jila leni yima alu, kong nisung 39,000 alir. Ajisüaka iba ajanga jila dak indang indangbo mekongshi.
Iba tzü ajanga alu tem raksatsüba den apu ka aser kitem raksaja liasü.
Television nung sayuba noksa ajanga nisungtem teberem tashi lishi nung asonger aliba nungi atsütetba nguogo.
Tir Jair Bolsonaro-i anir Brazil nung iba ita tetenzüklen sorkar tasen kümtetba sülen tang mezüngbuba lendong tulu atalokogo aser parnoki tensa asadanga azüoktsü atema Minas Gerais state nung defense, mining & environment ministries aser ketdangsertem tsüngda tesendaktep ka amenoktsüogo.