Brazil nung Zika virus den drone amshia rarar

Rio De Janeiro, February 21 (Agencies): Zika, dengue aser chikungunya viruse tem menashiba ‘Aedes aegypti’ merila poktetba tesem samatsütsü asoshi Brazil yimti aika nung ‘drones’ tem amshitsü tenzükogo.
Brazil nung yimti tuluba, Sao Paulo, ki shia nung aliba atsü, kilem aser merila pokteter ta temulung melemi bilemba tesem ajak nung merila ali mali metettsü atema drone yimzüdaktsüdar, ta Xinhua news agency ajanga metetdaktsü.
Zika virus yagi kinü dak timtem keter sodaktsür ta temulung melemni bilemba ajanga federal govt-i nisung aliba ki aser business tesem ajak nung merila samadaktsütsü mokozü akahba mapa kanga nendaka inyakdar.
Linük rangben nung Federal govt-i tang tashi nung ki million 60 tashi kanga junga mita reprangogo.
Civil servant telok balalaia linük tesem noklang nung shilem 40 tashi mesüra nisung aliba ki, businesses aser public ki million 27.5 tashi kanga junga mita reprangogo, ta sorkari ashi.
Aji oda süaka item teloktem ya tesem kar nungbo kiburtemi maitdaktsü nokdanger mesüra kidangi aodang shinga malir anungji item tesemtem nung drones amshitsü asoshi ketdangsertemi lemtet.
Sao Paulo health secretary Alexander Padilha-i ashiba agi, Latin America yimtitem sünga prokshir aliba iba tashidak ajema kümdaktsütsü asoshi drones tem ya hadir tajung lir. Iba den külemi ketdangsertemia kara kara tendangtetba inyakyim benoka iba tashidak putettsü merangdar.
Mato Grosso west-central state yimsüsürtemia par yimtitem nung merila den raratsü asoshi drone amshidaktsütsü temelaba agütsüogo.
Drones tem dak video camera enokja aliba ajanga drone amshirtemi merila poktetba tesem anüng nungi kanga kara meteter.
Brazil aser Colombia nung iba virus agi kokngshiba ajanga tanur asodang tekolak tilaba aser tekolok tangar memenep asor ta temulung melemi bilemer anungji scientists temi ibaji jangajatsü asoshi bushisüngdangdar.