Brazil o Argentina nati Colombia-Venezuela arrtsü ken o bentettsütsü meranger

Colombia foreign minister, Maria Angel Holguin (Achijilen)-i Argentina foreign minister, Hector Timerman (Abelaen) aser Brazil foreign minister Mauro Vieira na den Bogota nung tentetba San Carlos palace kilung nung ajurutepba noksa nung angur. (Bogota, September 05)

Bogota, September 05 (Agencies): Colombia aser Venezuel na tsüngda adokba arrtsü den sentakba mangatettep ken o bentettsütsü nükjidong nung Brazil aser Argentina na indang foreign minister-i Colombia kübok Bogota yimti yashi Hokolbar nü semdangba osang jangjaogo.

Colombia o Venezuela na tsüngda arrtsü ken o adokba sülen tanü tashi nung Colombia nung alir nisung 16,000 dak temai Colombia linük toktsütsüsa tia ajuruba osang bushiteta lir.

Venezuela Tir, Nicolas Maduro-i taoba August ita par arrtsü shibangtsüba den külemi, ozüng alema inyakba ken o dak atemer Colombia nung alir nisung 1,300 shi Venezuela-i aridoka yokba osanga bushitetogo.

Aji oda, Brazil foreign minister, Mauro Vieira aser Argentina foreign minister, Hector Timerman nati Colombia foreign minister, Maria Angela Holguin den yashi ajurutepa  Colombia o Venezuela nati par mangatettep ken o bentettsü asoshi jembitepba senden amentsü ajungshiogo.

Parnoki Venezuela foreign minister, Delcy Rodriguez dena Caracas yimti nung ajuruteptsü sentong renema lir.

Venezuela nungi meindokba nüburtemi pei tanurtem aniba den külemi, tang tagitsü osettsüset tapubang nung apur ayong ka ajangdangba noksa anguba sülen Latin America ajunga aoksadaktsüba osanga bushitetogo.

Ano külen, Venezuela-i par linük nungi meindokba nüburtemi par osettsüset bener aotsü asoshi aser ozüngi melaba ama immigration den sentakba maparen inyaka par arrtsü lapoktsüba sülen ang Venezuela Tir, Madu den ajuruteptsü renemba olen ka Colombia Tir, Juan Manuel Santos-ia sangoktsüogo.