Brazil: Senate-i Rousseff anema yimsüsütsü menden nungi anentsütsü ken o benoktsü lemteter

Brasilia, August 10 (Agencies): Brazil Senate-i par Tir, Dilam Rousseff anema yimsüsütsü menden nungi anentsütsü ken o benoktsü telemtetba ka tanep, Bodbar anepdang agiogo.
Senate yimsüsür nisung 59-i yimsüsür 21 den temaba jenjang ngua, Rousseff anema yimsüsütsü menden nungi anentsütsü ken o benoktsü lemtet aser tan telemtetba agiba ajanga Rousseff melena Brazil Tir menden abensang, Michel Temer Brazil Tir tasenba akümtsü akok.
Ajisüaka, Rousseff anema benokba ken o angadangba sentong tan August ita tatemlen tembangba sülen Senate yimsüsür shilem 3 nung shilem 2-i maneni la yimsüsütsü menden nungi anentsütsü vote agütsü nung dang Rousseff-i Brazil Tir menden asangsang nung toktsütsüsa jenjang ajurutsü.
2014 küm agiba tanabenren Brazil Tir menden abentsü asoshi agiba election nüboyimtsü mapang, 2014 küm Rousseff-i lar linük indang rongsenren jenjang asangsang ajurushia aliba dang nungi tajungba ali ama sayuba ken o nung la aitsüba sülen Senate-i Rousseff Tir menden nungi anena alitsü telemtetba taküm, 2016 May ita agia liasü.
Ajisüaka, iba mapang nungi tenzüka, Rousseff-i tanü tashi lai aibelena meinyak ta shia, la metentsü olen sangokja lir.
“Ni asen linük indang rongsenren mapatong den sentakba ozüng alema meinyak,” ta shia, la Tir menden nungi agiena yimtenren tajangzük angutsü nükjidong nung right-wing yimtenren teloki la anema inyakba olen ka lai metetdaktsüogo.
Tan la anema benoktsü renemba ken o angadangba sülen lai aibelenba kuli bushiteta la aitsüra, Rousseff-i küm 13 tashi Brazil madak yimsü asübaren tembangtsü.
Ano, Rousseff aitsüra, la melenzüka Temer Brazil Tir tasenba akümtsü aser pai iba tongti mendenji 2018 küm election magi tashi abentsü.