Brazil Senate-i Rousseff Tir menden nungi anentsütsü vote agütsüogo

Brasilia, May 12 (Agencies): Brazil senate-i Dilma Rousseff Tir menden nungi anentsütsü vote tanü, Brehostibar nü agütsüogo.
Brazil linük indang ronsenren jenjang mejungi akümbaren miimbangtsü nükjidong nung Rousseff-i linük indang rongsen ketsüngbaren ozüng alema inyak ta la nem tai tongloktsüba sülen Brazil’er senator-temi Rousseff Tir menden nungi anentsütsü vote agütsütsü sentongji tanü agia liasü.
Tanü agiba vote agütsüba sentong nung senator 81 rong nungi parnok 55 tashi Rousseff Tir menden nungi anentsütsü mulungba aser senator 22-i Rousseff nem maneni Tir menden bendaktsütsü atema vote agütsüba osang jangjaogo.
Aji oda, la Tir menden nungi anentsütsü mapatong tenzükba yong, Rousseff-i la den sentakba ken o metembang tashi Tir menden toktsütsüsa kümogo.
Rousseff teti asoshi Tir menden nungi anentsütsü mesüra mapang tatsüka asoshi Tir menden mebendaktsütsü telemtetba agitsü asoshi ita 6 shi agitsü akok aser iba mapang Rousseff melenzüka, Brazil Tatong Tir, Michel Temer-i Brazil Tir mendenji benoka alitsü.
Brazil’er mezüngbuba tetsür Tir, Rousseff-i lenisütsü menden abenba mapang par Brazil nung ochimashi inyakba, yimtenren tensa mejungi akümba aser rongsenren jenjanga tekübokleni aluba osang bushiteta lir.
Rousseff anema ozüng alema ochimashi inyakba ken obo benoka mali saka lai Tir menden tanabenren benokba jakdang Brazil linük indang rongsen ketsüngtsü asoshi latetba ozüng raksa aibelenba ken o Rousseff anema tang benoka lir.
Brazil nung tentetba tematiba okadak, Supreme Federal Tribunal nung Chief Justice-i tendanga, Brazil’er senate-i anogo 180 tashi agia Rousseff den sentakba ken o angdangba sülen senator 81 rong nung shilem 3 nung shilem 2-i Rousseff Tir menden nungi anentsütsü maneni lemtetra, Rousseff-i teti asoshi Brazil Tir menden nungi anentsüsa akümtsü aser lai taruba küm 8 tashi sorkar lenisütsü mendena abentsü temeten mangutsü.
“Ni aibelena mali saka ni Tir menden nungi tashiyim agi atsüngdoktsü nükjidong nung ni anemertemi ni anema ken o benoka lir,” ta 2011 küm election nung takok ngua, Brazil’er mezüngbuba tetsür Tir akümla, Rousseff-ia metetdaktsüogo.