Brazil sorkari Neymar dang senchi achir

Sao Paulo, January 29 (Agencies): FC Barcelona star, Neymar-i taoba mapang, 2007-2008 nung Santos telok tenüng nung asayadang sorkar nem saru shitak magütsüba ken o nung ajemdaker pa dang dollar sen 112,000 senchi achitsü asoshi agütsüba obendang tanaben reprangshitsü ken o nung tamakok anguba osang ka jangjaogo.
Neymar’er okatsürtemi Neymar dang senchi achitsü obendangji tanaben reprangshitsü onük okadak benok saka 2012 küm agütsüba obendangji magientsü obendang okadaki tan tanaben agütsüshir lir.
Kasa ken o nung Neymar tebua densema aliba osang jangjaogo.
Ano külen, 2013 küm Santos telok toktsür Barcelona telok nung züngsemtsü asoshi sen agütsütepdang ochimashi mashi inyakba ken o nung ajemdaker Neymar dang kuli tejangja taruba February ita 2 nü agütsütsü tetuyuba ka okadaki tuyua lir.
Iba ken o nung Barcelona Tir, Josep Maria Bartomeu; pa jakdang Tir menden abensang, Sandro Rosell; Neymar’er tsürapur aser Santos telok nung director menden abener nisung 2 tashi okadaki jaoka lir.