Brazil:Hopta ka tsüngda tepuokdak rara asemben adok

Brasilia, January 09 (Agencies) : Deobarnü tepuokdak tesem nung rara adoka tajemba agi parnok nisung pezü tashi süogo. Iba rara ya zünga linük nung hopta ka tsüngda tepuokdak tesem balala nung rara asembenbuba adoker asütsü.
Manaus yimti nung aliba Desembargador Raimundo Vidal Pessoa tepuokdak iba lendong nung asür rongnung nisung asem tashi tekolak tangzüka südaktsü aser ka tango mesashitettsüsa alenba ajanga asü, ta Amazonas State Penitentiary Administration Secretariat-i ashiba osangbenertemi metetdaktsü.
Linük nung osangbenertemi iba tepuokdak rara adokba azüoktsü mechi nung police tem kanga sashia renemer tepuokdak telungi aiba video kar sayua liasü.
Iba tepuokdak tesem ya kanga mejungi akümba ajanga yaküm October ita nung khen shibanger liasü saka Brazil tesem balala nung aliba tepuokdak kar nung nisung taküm agia raratepba sülen ano taoba hopta nungi tanaben lapok.
Tanga tepuokdak alirtem parnok nisung 300 shi tanaben lapokshiba tepuokdak yagi ita asem asoshi belener arua lir, ta ketdangsertemi ashi.
January 01, 2017 nü Manaus nung aliba Anisio Jobim Penitentiary Complex nung puoka alirtem tsüngda rara adokba lendong nung tajemba agi nisung 56 tashi asü. Ano taoba Hokolbarnüa Amazon kübok Roraima state, Brazil nung aliba Agricultural Penitentiary of Monte Cristo nung puoka alirtem tsüngda raratepdang tajemba agi nisung 33 asü, ta ketdangsertemi ashi.
Alima nung tepuoker timba aliba linük rongnung Brazil ya pezübuba lir. Brazil nung tang tepuokdak alir ajak agi 622,000 lir, ta justice ministry-i metetdaktsü.