Breast Cancer surgeon, Dr Raghu Ram nem Dr BC Roy National Award agütsü

New Delhi, March 29 (Agencies): Ushalakshmi Breast Cancer Foundation indang Founder/Director aser Padma Shri sempet ngur alisang, Dr Raghu Ram Pillarisetti nem Dr BC Roy National Award agütsü. Iba sempet ya India nung mozü amshir nem agütsüba sempet tulutiba lir.
Telangana aser Andhra Pradesh nungi iba sempet agizüker rongnung pa tanubusang lir.
Dr Raghu Ram ya Edinburgh nung aliba Royal College of Surgeon nung Overseas Gold Medal angur rongnung tanubusang aser Krishna Institute of Medical Science (KIMS) tenzüksang lir.
Mongolbarnü Rashtrapati Bhavan nung aliba sentong ka nung Dr Raghu Ram nem iba sempet ya India Tir, Pranab Mukherjee-i agütsü.
Dr Raghu Ram ya Association of Breast Surgeon, India nung tir lir aser Telugu state nungi Padma Shri sempet angur tanubusang lir.
Dr BC Roy National Award ya ‘Outstanding service in the field of socio-medical relief’ tenüng nung agütsür aser Dr Raghu Ram-i breast cancer atema India nung mapa tajung inyakba ajanga iba sempet ya agütsü, ta osang ajanga ashi.
Dr Raghu Ram-i tetsü tenüng nung lapokba Ushalakshmi Breast Cancer Foundation ajanga lenmang balala nungi breast cancer kümzüka alitsü aser anepalutsü asoshi sentong balala agüja, tesayuba aser teyari Telangana aser Andhra Pradesh nung agütsü.
“Kütsü Dr Ushalakshmi aser nisung kwikati mama cancer anema tasütait molungsentsü agi raraogo, ni iba sempet tulu ya parnok nem bendanga agütsür. Iba maongka kü nem agütsüba ajanga ni maneni bendanga agütsür medemertem, NGOs aser sorkar den külemi amteper kütsü tasoli nung mama cancer tongbang maneni raratsü,” ta Dr Raghu Ram-i ashi.