Brexit anemer meyirijang jenti London nung yimdongsüa jaja

Brexit telemtetba anemer nisung meyirijang jenti Britain yimtiba, London tiyongtsülen longkak aita yimdongsüa jajaba noksa nung angur. (London, July 02)

London, July 02 (Agencies): Brexit ta ajaba Britain-i European Union (EU) toktsütsü asoshi agiba telemtetbaren anemer nisung meyirijang jenti iba telemtetba agiba anema longkak aita London tiyongtsülen yimdongsü tanü, Honibar nü jajaogo.
Britain nüburtem rong nung vote bendentsü sentong agiba sülen par Britain-i EU toktsütsü telemtetba taoba hopta agi aser iba telemtetbaji agiba ajanga Britain-i tang yimtenren tensa tamajung ajurutsü tenzükogo.
Tanü sentong nung shilem agirtemi ‘Ni EU den lir’ ozülu abenba den külemi, ola tulu adoka ‘Onoki EU nung maneni züngsemtsü’ ta ayimtena yimdongsüa jajaba osang angazükogo.
Taoba Brehostibar nü agiba Britain EU nung maneni züngsemtsü mesüra EU toktsütsü telemtetba agitsü asoshi vote bendentsü sentong nung London nung alir nisung noklang shilem nung shilem 60 shi Britain maneni EU nung züngsemtsü vote agüja liasü.
Ajisüaka, Britain nütsüng yongsük noklang shilem nung shilem 52 tashi EU toktsütsü vote agütsüba yong par Britain-i EU toktsütsü lemtettsüsa aküm.
“Taoba hopta agiba vote bendentsü sentong agizüktsü memulungba ajanga asenoki Brexit asangsang nung ataloktsü maparen nokdangtettsü,” ta tanü sentong ayonger, King’s College graduate, Kieran MacDermott-i metetdaktsü.