Brexit atema parliament-i vote asütsüla: UK Supreme Court

London, January 24 (Agencies) : Britain European Union (EU) nung official süa anentsü metenzükdang UK Ato Kilonser Teresa May-i parliament vote agitsüla, ta Mongulbarnü UK Supreme Court-i tetuyuba agütsüogo. Iba tetuyuba ajanga Brexit nokdanger yimsüsürtemtem nem iba telemtetba melenshitsü maongka agütsür.
Iba dak sendakba bill ka anogo ishika tsüngda nung parliament atongtsü, ta okadaki ashi. May-i EU Lisbon Treaty indang arrla 50 dak kongshitsüsa tashi balaka mamshitettsü ta linük nung aliba okadak temabai telemtetba agütsüogo.
Aji oda süaka, obendangertemi linük atema tetsükdaktsü tulutiba magieni lir. Lai Brexit atema Scotland, Wales aser Northern Ireland atema temelaba agitsü tenüngdaktsü mali, item tesem ya lai mulungba ama anishitettsü.
“Arrla 50 mapa küma aotsü asoshi onoki anogo ishika tsüngda temelaba agütsütsü,” ta Brexit minister David Davis-i parliament dang ashi.
“Yamaji inyakba ajanga nüburtem taginüba aser Supreme Court-i tuyuba akümtsübuba sayutsü,” ta pai ashi.
Taküm March ita mamadangsa May-i arrla 50 nung kongshiner, ajisüaka Brexit maparenji tangbo EU den mepilaner, yimsüsürtem asoshi lapoktsüogo.
Aji oda süaka, opposition tongti telok, Labour Party-i, parnok ozüng yanglushitsüsa aküm yonga parnokibo Brexit inyakyim menokdangtsü, ta shiogo.
“Labour party-ibo mapa inyakertem temeden aser lokti o lipoküm kümzüka ayuba tsütsü nungita yaritsü,” ta party lenir Jeremy Corbyn-i ashi.
Osangbenertemi ashiba agi, House of Commons nung menden 650 rongnungi Labour telok nungi MP 80-i Corbyn-i ashiba mangai arrla 50 mapa küma modaktsütsü atema vote asütsü, aser Liberal Democrat Party-i lenmang tanga ka mepatet nungbo Brexit nokdangtsü ta metetdaktsüogo.