Brexit jakdang Britain-i Poland den sentaktepshitsü: May

London, November 28 (Agencies): Britain linüki lemtetba ama, asangsang nung Brexit ta ajaba par Britain linüki European Union (EU) toktsütsü maparen tatem küma inyakba jakdang par linük aser Poland na tsüngda tesendaktep tajungba küma yanglushitsü alizüng aliba olen ka Britain Ato Kilonser, Theresa May-i tanü, Hombar nü metedaktsüogo.
Par linük semdangla, Poland Ato Kilonser, Beata Szydlo den tanü ajurutepa senden amendang May-i iba olenji metetdaktsü.
Tanü senden nung lenir anati Britain nung jenoka alir Poland nüburtem taoba mapang nungi kanga agi timba akümba aser Britain-i taküm June ita Brexit telemtetba agiba sülen Britain nung alir Poland senso anema amakba maparen kanga sashia akümba den sentakba onük benoka jembi.
EU temzüng kübok Arrla 50-i melaba ama, Lisbon Treaty dak ajemdaker, Britain-i taruba küm 2 agia, EU asangsang nung toktsütsü atema jembitepba jakdang par linüki EU kübok züngsemba linük balala den tesendaktep tajungba küma yanglushitsü tenzüka lir.
“Brexit telemtetba agiba ajanga asen linük ana tsüngda tesendaktep tamajungba makümtsü imlar. Iba telemeshi tasen asangsang nung atalokba ajanga asen linük ana tsüngda tesendaktep taoba mapang nungi tali tashi itishitsü amanger,” ta May-i ashi.
Poland linüki 2004 küm nungi tenzüka EU nung züngsemtsü tenük aser par linük ya EU-i nungdakba temelenshi agitsü asoshi ajungshir tongti linük ka lir.
“Britain linük den tesendaktep junga ayutsü aser Britain o EU na tsüngda Brexit ken o jembidang Britain den angatettepa inyaktsü nangzüker,” ta Szydlo-ia metetdaktsü.
“Asenok tsüngda tangatettep aser amalitep tajung aliba ajanga ajaki agizüktettsüsa Brexit mapatong takok ngua inyaktettsü,” ta lai shisem.
Brexit mapatong tembanga agiba sülen Britain sorkari par linük alir EU senso nisung million 3 shi nem temeten agütsütsü aser EU-ia Europe tesem balala nung jenoka alir Britain nunger nisung million 1 nem agütsüba temeten anema meinyaktsü onük May-i Brexit onük jembidang benoktsü renema lir.
Ano külen, North Atlantic Treaty Organization (NATO)’er anüdoklen tentetba tesepti kümzüka ayutsü asoshi Britain-i par infantry mitkar company ka Poland-i tarutsü mapang yoktsü renemba osang ka May-i tanü lemsatepa liasü.