Paris, July 22 (Agencies): Britain linüki Brexit ta ajaba European Union (EU) toktsütsü maparen tekaratiba mapang nung agitsü tajungshiba olen ka France Tir, Francois Hollande-i yashi, Brehostibar nü metetdaktsüogo.
Hollande-i par linük semdangla, Britain Ato Kilonser, Theresa May den Paris yimtiba kübok Elysee Palace kilung nung ajurutepa senden ka amendang iba tajungshiba olenji metetdaktsü.
Ajisüaka, Britain-i EU toktsütsü den sentakba EU temzüng kübok Arrla 50 taküm, 2016 kümbo mebenoktsü renemba osang ka May-i Hollande dang metetdaktsüogo.
Britain-i Brexit telemtetba agiba yong Ato Kilonser menden toktsüsang, David Cameron melenzüka, Britain Ato Kilonser tasenba akümba sülen May-i tan mezüngsüa bendang linük semdanga, tan Bodbar nü Germany aser yashi, Brehostibar nü France semdanga liasü.
“Brexit telemtetba ya Britain nüburtemi agi aser iba yongji, ajaki par telemtetba agizüktsüla,” ta May den aroki osangbener den ajurutepdang Hollande-i sangoktsü.
“Britain-i Brexit maparen tekaratiba mapang nung inyakba tajungba asütsü kechiyong iba maparen atsünglangshiba ajanga mangatettep aser rarabangsen adoktsü ana nung dang lir. Britain-i EU toktsü aka, par linük aser EU na tsüngda tesendaktep taoba mapang ama junga ayutsü ajungshir,” ta Hollande-i metetdaktsü.
Ano, EU nung züngsemba linük nüburtem nem Britain nung mapa inyaktsü aser tetsükdakba kecha melii par linük semdangtsü temeten magütsüra, Britain nem EU’er shishilembadak shilem magidaktsütsü asoshi EU lenirtemi renemba osang ka pai metetdakja liasü.
“Brexit-ji Brexit lir,” ta shia, par Britain-i ajak ajangzüktsütsüsa par Brexit maparen inyaktsü alizüng ayuba olen ka May-ia metetdaktsü.
Hollande den ajurutepba jakdang May-i German Chancellor, Angela Merkel den Berlin nung ajurutepa senden amendang Britain-i Brexit maparen inyak tenzükba jakdang teshisadangba tajung agitsü ajungshiba osanga angazükogo.
You must be logged in to post a comment Login