BRICS-i kiralongra onük nung UN bangzüng agizüktsü bangjem

Deobarnü Goa nung 8buba BRICS Summit sülen nung (abelen nungi) Brazil Tir, Michel Temer, Russia Tir, Vladimir Putin, India Ato kilonser, Narendra Modi, China Tir, Xi Jinping aser South Africa Tir, Jacob Zuma nungeri joint documents nung sign asüba sülen tangokba noksa angur.

Benaulim (Goa), October 16 (Agencies): Deobarnü BRICS linüktemi alima linük ajak dang peipei linük nung kiralongra nokdangtsü ayongzükba den külemi kiralongraba anema raratsü atema UN bangzüng tekaraba nung agizüktsü bangjemogo.
Brazil, Russia, India, China aser South Africa (BRICS) senden tembangba sülen züngsem linüktemi Goa declaration ajanga, “Tekaraba nung UN General Assembly nung Comprehensive Convention on International Terrorism (CCIT) agizüktsü asoshi linük ajaki longjemer inyaktsü onoki ayongzüker,” ta metetdaktsü.
BRICS-isa, kiralongratsü atema senotsü bendenba inyakyimtem- ozüng alema sen melenba, mozü shibelenba, temzüng alema inyakba mapatem ama anentsütsüla, kiralongrar amenoka alibatem loksatsütsüla aser kiralongrartemi social media densema tim masüba nung internet amshiba anema inyaktsüla, ta ashi.
Goa declaration nungsa, “Kiralongraba anema takok ngua raratsü asoshi ajak külemi inyaktsü nüngdaker. Kiralongraba anema agiba mera ajakji International ozüng kübok asütsüla aser meimchir temeten alema masütsüla,” ta shia lir.
Tanep BRICS senden nung jembidang Ato kilonser, Narendra Modi-i, kiralongra anema raratsü asoshi mera takang agizüktsüla ta ayongzükba den külemi, alima nung kiralongra tetsüdiji Pakistan lir, ta aitsü.
BRICS lenirtem dang Modi-i, “Tesem nung kiralongraba ajanga tesünep, security aser terenlok amokmerener. Tia makatsü kaji- India’er kidanger linük (Pakistan) ya kiralongraba tetsü lir. Alima nung kiralongrabaji iba tetsüdi den sentaktepa lir,” ta ashi.
Paisa, “Senotsü agi kiralongra yariba, raraba osettem agütsüba, training agütsüba aser yimteni kiralongra nungitbaji anentsütsüla,” ta ashi.
Modi-isa, Comprehensive Convention on International Terrorism draft tekaraba nung agizüka benshitsüla, koba ajanga iba tebilemtsü asoshi asenoki lemtetba mapa agi sayutsü, ta ayongzük.