BRICS linüktemi longjemer kiralongra anema raratsüla: Swaraj

New Delhi, June 30 (Agencies): Kiralongrartem sentotsü agi yariba aser jenokdaktsüba linüktem nem temerenshi agütsütsüla ta shia tanü External Affairs Minister, Sushma Swaraj-i alima linüktemi kiralongraba anema longjemer raratsüla, ta ayongzük.
BRICS Youth Summit nung jembidang Swaraj-i, kiralongrar anema raraba nung kiralongrar ‘tajung’ mesüra ‘tamajung’ ta kecha tebendang makatsüla, ta ashi.
Swaraj-i ashiba agi, alima tzü-mopung melenshiba, sensak tia aser ochimashi ama alimai ajangshia aliba tayongzükba balala anema BRICS linüktemi (Brazil-Russia-India-China-South Africa) alima yanglushiba nung shilem tajung agidar, ajisüaka kiralongraba samatsütsü atema-a inyaktsüla.
“Asenoki- BRICS, UN Security Council aser Committee balala senteper International kiralongraba anema inyaktsüla aser raratsüla. Iba ya kiralongrar ‘tajung’ mesüra ‘tamajung’ ta kecha mebendangi raratsüla,” ta lai ashi.
“Alima meimchir anema inyakba kiralongrar kaji kiralongrar. Kiralongrartem senotsü agi yarir linüktem aser parnok jenokdaktsür linüktem nem tapet meyiptsütsüla,” ta Swaraj-i ashi.
Taküm October ita Goa nung India-i 8buba BRICS senden ayonga amungtsü. Linük pongu nung aliba nütsüng ya alima nütsüng shilem 42 lir aser GDP ji US sen trillion 16 dak tema lir.
“UN Security Council reforms atema-a asenoki longjemer inyaktsüla, koba ajanga 21buba putui nüngdakbatem atema iba tentet tapet asütsü,” ta lai ashi.
Lanurtem dak aliba tashi dak sentakba nung lai, India nunger senso million 800 bo arishi küm 35 kübok lir aser ibaji ajanga India ya alima nung rongsenkettsüng tekaratiba ainba linük ka kümdaktsür, ta ashi.
Iba senden nung BRICS linük ajak nungi lanurtem dendar.
India’er BRICS Chairmanship nung lanurtem dak rangloker sentong aika ayonga kadar.