BRICS nung Pak nung aliba kiralongrar teloktem sangdong

New Delhi, September 04 (Agencies): India kanga pelatsüsa, tang mezüng BRICS linüktemi Pakistan nung amenoka aliba kiralongrar teloktem- Lashkar-e-Taiba, Jaish-e-Mohammed aser Haqqani network sangdonga kiralongra aitsür.
China kübok Xiamen yimti nung ayongba senden nung BRICS (Brazil, Russia, India, China & South Africa) linüktemi, “Kiralongrartemi amakba ajanga tai maket Afghanistan nunger jenti asüba atema onoki sashia aitsür. Iba dak sendakba nung onoki tesem nung security tensa aser Taliban, ISIL/DAISH, Al Qaida aser item telok den sendaka aliba Eastern Turkistan Islamic Movement, Islamic Movement of Uzbekistan, Haqqani network, Lashkar-e-Taiba, Jaish-e-Mohammed, TTP aser Hizb ut-Tahrir teloktemi rara adokdaktsüba atema tebilemtsü akar,” ta sangdong.
India Ato kilonser, Narendra Modi-a iba senden nung dendar. Tanü pai Russia Tir, Vladimir Putin den senden ka amena aser Brazil Tir, Michel Temer dena senden ka amen; maneni asüng pai China Tir, Xi Jinping ajurua senden amenba sülen nikongdang Myanmar-i aotsü.
BRICS-i sangdongba bangzüng nungji Pakistan tenüngbo tetshia mali.
“Kiralongrartemi BRICS linüktem densema alima nung tesem balala amakbaji onoki magizüker aser kiralongra tapu ajak aitsür,” ta BRICS linüktemisa sangdong.
Tang mezüng BRICS-i Pakistan nung amenoka aliba kiralongrar teloktem tenüng dangdonger. Yaküm December ita Amritsar, India nung Heart of Asia conference on Afghanistan nunga kiralongraba teloktem sangdonga liasü, aser iba mapang nunga Lashkar aser Jaish naji kiralongrar telok ta sangdong.
BRICS bangzüng ji shidi tapak 30 nung renem aser ojang 7,500 shi lir.
“Tang mezüng (BRICS-i) kiralongrar teloktem sangdongogo,” ta Ministry of External Affairs nung otongdar, Preeti Saran, Secretary (East)-i osangbenertem dang metetdaktsü.
North Korea-i nuclear trokben tendangba maang ka nung BRICS senden menogo, aser parnoki “Linüktemi nuclear tendangbaji sashia aitsür,” ta metetdaktsü.