Brigadier Kurichu Myanmar nung asü

Guwahati/Dimapur, June 11 (Agencies): National Socialist Council of Nagaland indang Naga Army nung Brigadier Kurichu Hombarnü asü. Pa ya asür SS Khaplang den teyariteper tajung ka liasü.
Brigadier Kurichu ya Indian security forces-i aputsü atema bushiyonga aru aser Myanmar kübok Sagaing region nung mozü ki ka nung asü.
NSCN (K) ajanga ashiba agi Kurichu ya parnok tongtipang lennirtem rongnung ka liasü.
Kurichu ya temang manemi akümba agi Sagaing division kübok Hkamti civil hospital nung anepalutsü anioka liasü.
June 10, 2019 nü Brigadier Kurichu, Army unit of CHQ ajungbena asüba atema temolung raksar ta Government of the People’s Republic of Nagaland-i tanü sangdong ka nung metetdaktsü.
Brigadier Kurichu ya Wuzu nunger Tsiichi’er jabaso tambusang liasü. Pa 1986 küm NSCN nung züngsem aküm aser küm 33 tashi inyaka arudang mapa balala inyak.
2001 tashi pai Operations aika ketdangsüa inyak aser 2001 nungi 2010 tashi pa Tissary Region nung chairman inyak. 2010 nungi 2015 tashi pa Mobile-v, Naga Army unit nung Commander inyaktsü shim. Iba sülen 2015 nung pa tasünü tashi Council Headquarters Unit nung mapa lemzükja liasü.
Brigadier Kurichu-i linük kanga junga tenzükba atema Naga nungeri tasütait sepai nem tetushi agütsür aser President indang office-i pa nem Naga Army nung Major General jenjang nung ajungkettsür, ta Government of the People’s Republic of Nagaland sangdong ka nung ashi.
Brigadier Kurichu-i toktsür aoba kinungtsü, tanur pezü aser semchir 2 den asükhu lemsateper aser pa tanüla teti atema anisüngzük ngudakjangma, ta parnokisa shisem.