Brisbane doubles final Sania Mirza-i akok

Tebur final Nishikori aser Dimitrov na asayatsü

Brisbane, January 07 (Agencies): India tsür tennis asayar mongin Sania Mirza-i tan season atema mezüngbuba takok marok nguogo, America tsür Bethanie Mattek-Sands tenati Brisbane International women’s double marok nguogo, saka la double nung World No.1 aliba jenjang la den külemi asayala kümogo.
Temaba jenjang nung alila Mirza aser Sands nati 6-2, 6-3 agi tanabuba jenjang nung alir Russia tsür Ekaterina Makarova aser Elena Vesnina madak final nung takok angu.
Saka iba takok ajanga WTA double asayar rongnung Sania hopta 91 World No.1 aliba jenjang tembangogo. Iba jenjang nung America tsür Bethanie Mattek-Sands lir.
“Ni Miss World No.1 korang agütsür amai bilemer,” ta Sania-i asaya temer jembidang shia liasü.
India tsür Sania ya taoba küm iba tournament nung Swiss tsür Martina Hingis den külemi asaya takok ngua liasü.
“Onoki Vesnina/Makarova den teti match tajung asayar. Iba tournament maneni akokba ya kanga junger. Kü indang partner aser medemer(Bethanie Mattek) dang kanga pelar. Onoki talangka asaya aruogo. Onoki külemi küm nung khen asayar, tesüsa Sydney nung asayaba nung takok angu,” ta Sania-i ashi.
“Ana külemi ano maneni sayatsüla. Kü den külemi sayaba atema kanga pelar. Ni alima nung No.1 liasü, saka la No.1 akümba atema pelar. Ni mesüra la aser lai taküm kanga junga asaya liasü,” ta Sania-isa shisem.
January 16 nungi tenzüktsü asayaba Australian Open nung Sania Mirza aser Czech Republic tsür Barbora Strycova külemi asayatsü sentong lir.
Kasa asayamung nung Bulgaria nunger Grigor Dimitrov aser Japan nunger Kei Nishikori tebur kija final nung ajuruteptsü.
Honibarnü semi final asaya nung Dimitrov-i Canada nunger Milos Raonic aser Nishikori-i Switzerland nunger Stan Wawrinka na koka final asayatsü maongka ngutet.
World no. 17 Dimitrov-i world no. 3 Raonic aoksaja minute 87 tsüngda nung 7-6 (9-7) 6-2 agi takok angu, ta Efe osang ajanga metetdaktsü.
Dimitrov-i final jenjang atongtsü atema America nunger Steve Johnson aser France nunger Nicolas Mahut na mezüng aser tanabuba round tem nung akok. In sülen pai Austria nunger Dominic Thiem aser Canada nunger Milos Raonic na madak takok tulu angu.
Pai final asaya nung tesüiba mapang asemben tashi mekoki alisang, Kei Nishikori akoktsü imla atar.
Wawrinka madak 7-6 (7-3) 6-3 agi takok angusang, Japan nungi tennis asayar Nishikori-i Dimitrov madak Shanghai nung asayaba 1,000 Masters (2013), Miami nung (2014) aser Canada nung (2016) final asayatem nung takok ngua lir.