Brisbane International: Sharapova o Halep nati shilem magitettsüsa akümer

Brisbane, January 05 (Agencies): Defending champion, Maria Sharapova aser temaba jenjang nung alir, Simona Halep nati tang tasayadak Brisbane International asayamong nung shilem magitettsüsa jenjang ajuruogo.
“Tan January ita tatembanglen asayatsü ayongba Australian Open asayamong nung shilem agitsü tangatetba nung ni tan asayamong nung shilem magi anisüngzüktsü lemtetogo,” ta asayatsü terenemshiba agidang teka yirula, Sharapova-i metetdaktsü.
Arishi küm 28 tain Sharapova-i külem sensotsür, Ekaterina Makarova den 1 buba round asayatsü lemzüka liasü saka lai asayamong nung shilem magitsü lemtetba yong Makarova-i külem sensotsürsa, Margarita Gasparyan den 1 buba round asayatsü lemzükshiogo.
Tetsür World No. 2, Halep-ia la tetsüng yiruba yong tan asayamong nung shilem magitettsüsa akümba osang metetdaktsüogo.
Romania tsür Halep-i taoba World No. 1, Belarus tsür Victoria Azarenka den 2 buba round asayatsü lemzüka liasü saka Azarenka-i joko Belgium tsür Ysaline Bonaventure den ang 2 buba round asayatsüsa jenjang ajuruogo.