Britain atema terenem Brexit aginür: Theresa May

Brastilava, July 29 (Agencies): Britain-i European Union (EU) takok ngua toktsütsü nükjidong nung Brexit ta ajaba Britain linüki EU toktsütsü maparen terenem aginüba olen ka Britain Ato Kilonser, Theresa May-i yashi, Brehostibar nü metetdaktsüogo.
Britain-i Brexit telemtetba agiba sülen EU nung züngsemba linüktem semdangtsü tenzükla, May-i yashi Slovakia linük semdanga par Ato Kilonser, Robert Fico den Bratislava yimti nung senden ka amenba sülen tenati aroki osangbener den ajurutepdang lai iba olenji metetdaktsü.
Britain nübur rong nung vote bendentsü sentong agiba sülen Britain-i EU toksütsü onük pusemer timba küma, par linüki EU toktsütsü asoshi taoba June ita 23 nü lemteta liasü.
“Tang benshia aruba mapatong nung ajemdaker masü saka EU aser Britain naprongla ajangzüktsüsa Brexit mapatongji takok ngua inyaktsü sentong lir,” ta May-i ashi.
“Britain nüburtemi Europe sensotemi tetsükdakba kecha meli Britain semdangtsü den sentakba tebilemtsü khuret benokba agientsüba den külemi, Britain-i tajangzük angutsüsa Europe’er shishilembadak shishilembatsü temeten angutsü nungdaka lir,” ta lai shisem.
Britain-i par Brexit telemtetba agiba sülen Europe nung jenoka alitsü meranger migrant nisungtem par Britain nung maneni jenoka lidaktsütsü aser EU’er tongti shishilembadak par Britain-i tongti shilem agitsü mapatong anaprongla takok ngua inyaktsü lenmang bushitsü tenzüka lir.
Norway, Switzerland aser Iceland linüktemi inyakba ama, Britain-ia par rongsen jenjang tajungba kümdaktsütsü asoshi European Economic Area mesüra European Free Trade Association nung züngsemtsü akok.
“Britain-i asangsang nung EU teti asoshi toktsüba jakdang EU-ia tanaben shisadangtsü nungdaka lir,” ta Fico-ia metetdaktsü.
Britain-i EU toktsütsü lemtet aka, par linüki Brexit maparenj taküm küm tatemlen ang inyaktsü renemba osang angazükogo.