Britain chubachir, Prince Harry-i Nepal semdanger

Britain chubachir, Prince Harry (Tiyongtsü)-i Kathmandu kübok Tribhuwan International Airport tonga aoba sülen osangbener dak pa teka ayiploktsüba noksa nung angur. Ketdangser nisung 30 shi anisang, Harry-i anogo 5 agia Nepal semdangtsü sentong renema lir. (Kathmandu, March 19)

Kathmandu, March 19 (Agencies): Britain chubachir, Prince Harry-i Nepal linük tonga tanü, Honibar nü aoba osang jangjaogo.
Yaküm Nepal nung atalokba menoknok lendong nung densemer aser lendong ajurutem yariba Gurkha mitkartem den ajuruteptsü nükjidong nung Prince Harry-i tan anogo 5 agia Nepal semdanger lir.
Nepal aser Britain na tsüngda tesendaktep junga ayutsü tenzüker küm 200 ajungba mapang ka nung Harry-i tan mezüngsüa Nepal semdanger lir.
Arishi küm 31 tain Harry-i tan Nepal semdangdang Nepal Ato Kilonser, K.P. Sharma Oli aser Nepal linük’er mezüngbuba tetsür Tir, Bidhya Bhandari na dena ajurutepa senden amentsü sentong renemogo.
“Sentong renemba ama, Prince Harry tanü Kathmandu kübok Tribhuwan International Airport tongogo. Pai tan ozü Nepal semdangba ajanga ozü linük ana tsüngda tesendaktep tajungba akümtsü imlar,” ta Nepal’er foreign ministry otongdar kati metetdaktsü.
Nisung 9000 tashi taküm samadakja yaküm, 2015 küm April ita atalokba magnitude 7.8 tesashi menoknok lendong atalokba tesemtema Harry-i semdangtsü sentong renema lir.
Britain mitkar nung küm 10 tashi züngsemba sülen yaküm June ita mitkar mapa toktsüsang, Harry-i mitkar ketdangser ka ama Afghanistan nung anaben tashi tenzük aser idangji pai Gurkha mitkar züngsem jenti meteta aküm.
Harry-i tan Nepal semdangdang Himalaya tenemtsünglen tetsüng agi jaja sentzütsü aser Gurkha mitkar züngsem ka’er kidang aonung ka yipzüktsü sentonga renemba osang angazükogo.
Küm 200 tejaklen nungi tenzüka Britain mitkar rong nung Nepal nungi aniokba Gurkha mitkar züngsem 2,500 densemba Gurkha brigade tenteta lir.