Britain Foreign Secretary, Hammond-i China semdanger

Beijing, August 12 (Agencies): Alima tashi abenba linüktemi Iran’er nuclear sentong anentsütsü asoshi tenzükba maparen mapa küma inyakba ajanga North Korea’er nuclear sentonga nokdangtettsü tamang akaba olen ka Britain Foreign Secretary, Philip Hammond-i tanü Bodbar nü metetdaktsüogo.

Britain aser China na tsüngda security amalitep alitsü aser par linük anati külemi lungjemer alima tali tatsükba akümba ajanga alima tsüngsang mupong balaka küma melenshidaktsübaren azüoktsü maparen inyaktsü onük benoktsü nükjidong nung tang Beijing semdanga alisang, Hammond-i tanü Peking University nung o jembidang iba olenji metetdaktsü.

Hammond-i asüng, Brehostibar nü China’er tongti foreign police advisor, Yang Jiechi den ajurutepa senden ka amenba den külemi, Tianjin nung tentetba Airbus tayimtsü yangludak semdangtsü sentong renema lir.

“Alima tashi abenba linük lenirtemi Iran den Vienna yimti nung nuclear tezüngzüktep takok ngua agiba ajanga North Korea densema alima ajunga nung nuclear tongpang osettsüset yanglutsü maparen tali azüoktettsü imlar,” ta Hammond-i tanü metetdaktsü.

Iran anema benokba rongsenren tenokdangbaren agientsü melena par linüki tenzükba nuclear sentong anentsü alizüng agitsü maparen Britain-i bendanga agüja nungitba osang jangjaogo.

“N Korea-i tenzükba tongpang nung amshitsü nuclear osettsüset yanglutsü maparen anendaktsüba asoshi Britain-i nungdakba maparen bendanga agüja inyaktsü renema lir. Iba alizüng asangsang nung ajangzüktsü asoshi China-ia tongti shilem agitsüla,” ta pai ashi.

Ano, par linük anati külemi lungjemer Africa nung terenlok bener arutsütsü, kiralongrartem anema takok ngua raratsü aser alima tsüngsang mupong balaka küma melenshibaren azüoktsü maparen takok ngua inyaktsü bilemba olen ka Hammond-i tanü lemsatepogo.

“Tashiyim agi masü saka temzüng ozüngi latetba dak ajemdaker mangatettepbaren ajunga agientsüji kanga dang tongtipang,” ta shia, China-i South China Sea par yimli kübok aiter ta züngoka kidangsüa aliba linüktem den adokba mangatettepbaren ajunga tajungtiba lenmang bushia bentettsü olen ka pai tanü metetdaktsü.