Britain Foreign Secretary, Hammond-i Cuba linük semdang

Havana, April 29 (Agencies): Britain Foreign Secretary, Philip Hammond-i Cuba linük yashi, Brehostibar nü semdanga Cuba lenirtem den ajurutepba osang jangjaogo.
Hammond-i tan Cuba semdangba ya Britain’er Foreign Secretary kati 1959 sülenbo tan mezüngsüa Cuba semdanger lir.
Cuba linük den shishilembatsü aser raliwalitsüren tesendaktep tajungba küma yanglushitsü nükjidong nung Hammond-i tan Cuba semdangba osang angazükogo.
Hammond-i Cuba tonga aoba sülen par Briain-i Communist yimsüsütsü yimya benshiba asetkong linük, Cuba den tesendaktep tajung ayutsü alizüng ayuba osang lemsatepa liasü.
Ano, par linük anati energy, education aser rongsenren mapatong balala amalitepa inyaktsü tezüngzüktepa ishika zülutepa agiba osang jangjaogo.
“Britain aser Cuba na indang yimsüsütsüren khen yongi balala lir. Ajisüaka, Cuba-i lokti aser rongsenren temelenshi agiba mapang ka nung ozü Britain-i Cuba sorkar aser par nüburtem den tesendaktep junga ayutsü mulunga lir,” ta Hammond-i metetdaktsü.
Yaküm aser taküm na tsüngda nung Britain-i taoba mapang ayokba osettsüset dang nungi noklang nung shilem 25 agi timba Cuba dang ayokba osang ka British Department Trade & Industry-ia metetdaktsüogo.
Ano, Canada sülen anidaka, Britain nübur nisung 160,000 shi Cuba semdanga yaküm Cuba semdanger raliwalirtem rong nung Canada sülenbo Britain nunger timba aliba osanga bushitetogo.
Hammond-i Cuba nung lokti tentet, rongsenren, nübur nem agütsüba temeten aser Zika virus amala, alima jenjang nung taküm junga alitsüren nem timtem agütsüba onüktem benoka Cuba’er lenirtem den senden amentsü sentonga renema lir.
US Tir, Barack Obama-i taküm March ita Cuba semdanga 1928 küm sülen Cuba semdanger US Tir mezüngbuba akümba sülen Hammond-i tan Cuba semdanger lir.