Britain-i Ato Kilonser tasenba shimtsü maparen tenzüker

London, July 05 (Agencies): Britain madak yimsü asütsütsü temeten ngua aliba Conservative Party yimtenren teloki David Cameron melenzüka Britain Ato Kilonser tasenba inyakdaktsütsü asoshi yimsüsür tasen shimtsü maparen tenzükogo.
Britain-i tawa Brexit ta ajaba European Union (EU) toktsütsü telemtetba agiba sülen Cameron-i Ato Kilonser menden toktsütsü lemtet aser iba yongji, par Conservative teloki tan yimsüsür tasen shimtsü maparen tenzüker lir.
Tan Ato Kilonser menden asoshi tokteper candidate rong nung Britain maneni EU nung züngsemtsü pusemer, Britain Interior Minister, Theresa May-i temaba jenjang ngua aliba osang bushiteta lir.
Britain-i Brexit telemtetba agiba sülen tang telungjem raksar aliba Conservative telok tanaben ka küma lungjemtsütettsü ta May dak temulung alemba osang jangjaogo.
“Britain-i tekaratiba mapang nung EU toktsütsü atema EU lenirtemi ajungshiaka, Arrla 50 kübok densemba Britain-i EU toktsütsü mapatongji taküm 2016 küm tatemlen ang mapa küma inyaktsü tebilemba lir,” ta May-i metetdaktsü.
Ajisüaka, Britain-i ajurushia aliba makmakshimak tia agientsü nükjidong nung Britain-i tekaratiba mapang nung EU toktsütsü maparenji tatem küma inyaktsü tajungshiba olen ka May den Ato Kilonser menden asoshi toktepla, Andrea Leadsom-i metetdaktsüogo.
May aser Leadsom na den külemi, Britain Justice Minister, Michael Gove; Work & Pensions Secretary, Stephen Crabb aser Liam Fox nungeri Cameron melenzüka Britain Ato Kilonser tasenba akümtsü alizüng yua lir.
Conservative telok nungi MP 330-i par 5 rong nungi vote tajemba angur 3 agienba sülen vote timba angur candidate 2 shimtsü.
Tesülen, Conservative telok nung züngsemer nisung 150,000-i MP-temi shimba yimsüsür ana rong nungi ka Britain Ato Kilonser inyaktsü asoshi shimtsü aser iba osangji taküm September ita 9 nü alima dang sangoktsütsü renema lir.