Britain-i Belgium nungita yaritsü nangzüker: David Cameron

London, March 22 (Agencies): Britain linüki Belgium sorkar nungita yaritsü tenangzükba olen ka Britain Ato Kilonser, David Cameron-i tanü, Mongolbar nü metetdaktsüogo.

Kiralongrartemi Belgium kübok Brussels yimti nung pokshitsü lendong 3 tashi tanü atalokdaktsüba sülen Cameron-i tanü iba olenji metetdaktsü.

“Brussels yimti nung lendong kanga sashia atalokdakja ishiba agi nisung 26 shi asüba aser nisung 130 shi yiruba osang angazükba sülen ni kanga aoksaogo. Tan lendong ajururtem yaritsü aser lendong atalokdaktsürtem merenshitsü maparen nung ozü Britain-i Belgium nungita par linük nem nungdakba teyari agütsütsü nangzüker,” ta Cameron-i ashi.

Ano, tan Brussels nung lendong atalokba den sentakba onük benoka jembitsü asoshi par yimsüsürtem den senden ka amentsü renemba osang ka pai metetdakja liasü.

Ano külen, tan Brussels nung lendong atalokba sülen London kübok Gatwick airport densema, Europe nung tentetba tongti tayimtsü anendak balala nung ketdangsertem tali kümdangshitsü tenzüka osanga angazükogo.

Yaküm France yimtiba, Paris nung lendong atalokdaktsütsüren nung tongti shilem agir ta temulung malemer, Salah Abdeslam Brussels nung taoba hopta apuba atema kepzüka tan Brussels nung lendongji atalokdaktsü südi ta sorkar ketdangsertemia temulung malemba olen ka metetdaktsüogo.