Britain-i EU nung maneni züngsemtsü ajungshir: Bishop

Sydney, April 29 (Agencies): Britain linüki European Union (EU) metoktsütsü tajungshiba olen ka Australia sorkari tanü, Hokolbar nü metetdaktsüogo.
Britain EU nung maneni züngsemtsü mesüra par linüki EU toktsütsü lemtettsü asoshi par nüburtem rong nung vote agütsüba sentong ka taküm June ita 23 nü agitsü ayonga lir.
“Britain-i EU nung maneni züngsemtsü ajungshir kechiyong Britain EU nung maneni züngsemba ajanga ozü Australia ajangzüktsü,” ta Australia Foreign Minister, Julie Bishop-i tanü sangoktsü.
US yimtiba, Washington D.C. nung tan April ita tetenzüklen amenba Nuclear Security Summit senden tezülena Bishop-i Britain Ato Kilonser, David Cameron den ajurutepa, par Britain linük EU nung maneni züngsemtsü ajungshiba osang angazükogo.
Laisa ashiba agi, EU ya Australia den shishilembaba tongti tentet ka lir aser Britain-i linük 28 züngsemba EU nung maneni züngsemtsüji lar Australia linük atema kanga dang tongipang.
China den shishilembabaren mapatong jenti inyaka, Australia-i shishilembaba tentet aser linüktem rong nung EU ya tongtipangtiba lir.
Ano külen, EU den tetsükdakba kecha meli shishilembatsü tezüngzüktep agitsü maparena tenzüka lir aser Australia o Britain na tsüngda kümshi dollar sen billion 16 shi jenjang aketba shishilembatsü mapatong inyakba osanga bushiteta lir.
Britain EU nung maneni züngsemtsü telemtetba agitsü asoshi par nüburtem ajungshitsü asoshi Cameron-ia alima lenirtem ajungshia senzüba aser US Tir, Barack Obama-ia Britain maneni EU nung züngsemtsü ajungshiba osanga jangjaogo.