Britain-i EU nung züngsemtsü vote agi

London, June 23 (Agencies): Britain nüburtemi par Britain European Union (EU) nung maneni züngsemtsü mesüra EU toktsütsü telemtetba agitsü asoshi vote bendentsü sentong tanü, Brehostibar nü agiogo.

Alima ajunga nung yimtenren lenir aser shishilembartemi tebilemtsü kaa repranga atadang Britain-i par vote bendentsü sentong ya agitsü tenzüker lir.

Britain-i toktsütsü lemtetra, linük 28 züngsemba EU-i rongsenren aser mitkar takoksa tulu ajurutsü.

Britain nunger yimsüsürtemi taoba ita 4 tejaklen nungi tenzüka par nüburtemi EU nung maneni züngsemtsü mesüra toktsütsü ajungshiba sülen tanü par nüburtem rong nung vote bendentsü sentongji agiogo aser tan vote agiba ajanga bener arutsüba telemtetba osang asüng, Hokolbar nü alima dang sangdongtsü renema lir.

Par Conservative Party aser UK Independence Party (UKIP) yimtenren telok nati kanga sashia ajungshiba yong Britain maneni EU nung züngsemtsü pusemer, Britain Ato Kilonser, David Cameron-i par Britain EU nung maneni züngsemtsü mesüra toktsütsü telemtetba tatem küma agitsü asoshi tan nüburtem nungi vote bendentsü sentong ya ayong.

Britain-i EU toktsüba ajanga par Britain linük indang rongsenren jenjang tajungba akümtsü ta EU toktsütsü pusemertemi metetdakja lir saka Britain-i EU toktsüba ajanga Britain linüki küm 10 dak tema rongsenren jenjang tamajung ajurutsü ta EU nung züngsemtsü pusemertemi metetdaktsüogo.

“Asen chir aser semchirtem indang tarutsü tia tajungba kümdaktsütsü tangatetba nung ni Britain EU nung maneni züngsemtsü vote agütsüogo,” ta Cameron-ia tanep vote agütsüba sülen metetdaktsü.

Ano, “Asen nüburtemi peisasa pei dak temulung alemtsü mapang tajung ka lir. Asenok ajungai aroki shilem agia asen Britain linük nem nüchiso agütsütsü ayongzüker,” ta EU ken o nung Cameron anema nokdaksang, taoba London Mayor, Boris Johnson-ia EU toktsütsü vote agütsüba sülen metetdaktsü.

Ano külen, Britain-i EU toktsütsü lemtetra, Scotland-ia Britain toktsütsü lemtettsü atema par nübur rong nung vote bendentsü sentong agitsü bilemba olen ka Scotland Ato Kilonser, Nicola Sturgeon-ia metetdaktsüogo.

US Tir, Barack Obama aser China Tir, Xi Jinping na densema, bendang linük lenirtemia Britain EU nung maneni züngsemtsü ajungshia lir.

“Britain-i EU nung maneni züngsemtsü ajungshir kechiyong Britain-i EU toktsüba ajanga Europe dang masü saka West ajunga tashi meiti akümtsü. Ajisüaka, asenok lungjemra, asenoki aroki lungjemer tarutsü mapang nung ajurushiba timtem aser khuret ajunga takok ngua bentettsü,” ta European Council Tir, Donald Tusk-ia metetdaktsüogo.