Britain-i EU toktsütsü election tanaben agishitsü onük magizüker

Britain-i taoba June ita agiba Brexit ta ajaba Britain-i EU toktsütsü telemtetba anemertemi  ozülu balala bener London yimtiba tiyongtsülen longkak aita yimdongsüa jajaba noksa ka yangi angur. (London, July 09)

London, July 09 (Agencies): Britain sorkari par Britain European Union (EU) nung maneni züngsemtsü mesüra EU toktsütsü election tanaben agishitsü asoshi Britain nunger nisung million 4.1 shi benokba onük magizüktsü lemtetba osang ka tanü, Honibar nü metetdaktsüogo.
Taoba June ita 23 nü agiba EU nung maneni züngsemtsü mesüra EU toktsütsü asoshi agiba vote bendentsü sentong nung Britain nütsüng yongsük noklang nung shilem 52-i toktsütsü vote agütsüba sülen Britain-i Brexit ta ajaba EU toktsütsü telemtetba agia liasü.
Taoba June ita agiba vote bendentsü sentong nung Britain nütsüng yongsük noklang nung shilem 60 den tajemba agi dang pei vote agüja shilem agiba onük dak ajemdaker Britain-i vote bendentsü sentong tanaben ayonga agishitsü asoshi Britain sorkar den onük benok.
Ajisüaka, “Britain-i Brexit telemtetba agibaji putu aika nung iba amala tongtipang telemtetba ken dang agir ta Britain Ato Kilonser, David Cameron-i aniba Britain sorkari metetdaktsüogo aser iba yongji ajaki Brexit telemtetba agizüktsüla,” ta Britain’er foreign ministry-i metetdaktsü.
“Britain-i Brexit telemtetba agiba sülen ajak ajangzüktsüsa Brexit telemtetbaji asangsang nung atalokdaktsütsü asoshi ajaki inyaktsü ajungshir,” ta ministry-isa ashi.
Britain-i agiba Brexit telemtetbaji ajaki agizüktsü tayongzükba olen ka Cameron melenzüka, Britain Ato Kilonser menden asoshi tokteper Conservative Party (CP) yimtenren telok nungi tetsür yimsüsür, Interior Minister, Theresa May aser Energy Minister, Andrea Leadsom napronglai metetdaktsüogo.