London, June 24 (Agencies): Britain nüburtemi otsüsütsüsa European Union (EU) toktsütsü telemtetba agiogo aser iba tongti telemtetba agiba ajanga par lenir, David Cameron-i Britain Ato Kilonser menden toktsütsüsa jenjang ajurogo.
“Britain nüburtemi lenmang tanga nung jajatsü telemtetba tejangja agiogo aser iba yongji, ozü nüburtemi lenir tasen ka nungdaka kümogo,” ta Britain-i EU toktsütsü lemtetba osang jangjaba sülen Cameron-i osangbener den London kübok 10 Downing Street nung ajurutepdang tanü sangoktsü.
Ajisüaka, Cameron-i taküm September ita tashi Ato Kilonser mendenji abenba sülen taküm October ita nung ang yimsüsütsü mendenji toktsütsü.
Britain nüburtemi tan mangmangtettsüsa EU toktsütsü lemtetba ajanga Cameron-i par nübur anitsü temeten monguteti akümba osang ka Britain linük jenjang tendanger mongintemia metetdaktsüogo.
Britain-i EU toktsütsü mesüra EU nung maneni züngsemtsü ken o nung Cameron anema kanga sashia nokdaksang, taoba London Mayor, Boris Johnson-i Cameron melenzüka Britain Ato Kilonser tasenba akümtsü akok.
Yashi, Brehostibar nü agiba vote bendentsü sentong nung EU toktsütsü pusemertemi vote noklang nung shilem 51.89 tashi ngua par teloki aginüba ama, Britain-i EU toktsütsüsa jenjang bener arutsü.
Britain-i tan EU toktsütsü lemtetba sülen par pound sen jenjanga küm 30 tsüngda nung tang teküboktiba jenjang tonga aluba osang angazükogo.
Britain-i tan EU toktsütsü lemtetba sülen par Britain-i makmakshiba tensa tasen ka ajurutsüsa tang tia ajurur lir aser par linüki Europe kübok densemba linüktem den tan asensa tesendaktep tasen yanglushitsü nungdaka akümer lir.
US Tir, Barack Obama densema, alima linük lenir aser tongti shishilembartemi Britain EU nung maneni züngsemtsü asoshi ajungshia liasü saka Britain nüburtemi tajungshibarenji magizüki EU toktsütsü lemtet.
You must be logged in to post a comment Login