Britain-i opposition yimsüsür, Jo Cox mang ayimer

London kübok Parliament square nung Labour opposition yimsüsür, asür Jo Cox nem aküm agüja, tetsür kati narok yutsüba noksa nung angur. (London, July 17)

 London, June 17 (Agencies): Britain parliament nung linük wako tongshi tom nung metonga, Britain linüki asür opposition yimsüsür, Jo Cox nem tanü, Hokolbar nü aküm agütsüogo.

Opposition Labour Party yimtenren telok nungi yimsüsür, asür Cox Britain anüdoklentip tsütsülen lar jila, Birstall nung yashi, Brehostibar nü tepset.

Tanur 2 tetsü, arishi küm 41 tain Cox tejak nung injang kaloktsüba den külemi, la temang nung kotari agi aiben tsüngokja la yashi anüngdang yimti yimdong nung tepsetba osang angazükogo.

Britain-i European Union (EU) nung maneni züngsemtsü lemtettsü pusemla, Cox tespetba ajanga taruba hopta agitsü renemba Britain maneni EU nung züngsemtsü mesüra par linüki EU toktsütsü telemtetba agitsü atema vote bendentsü mapatong tang makmakshimak agi sünger lir.

Cox tepsetba ken o nung ajemdaker arishi küm 52 tain Thomas Mair apuba aser pa ket nungi prangpong ka aser kotari ka bena aruba osang police-ia metetdaktsüogo.

Ano, Mair ya tekolok meshidaki alir ka aliba osang ka par kinüngertemia metetdakja liasü.

Aji oda, Cox tepsetba sülen tan June ita 23 nü agitsü renemba Britain EU nung maneni züngsemtsü telemtetba agitsü sentong den sentakba nüboyimtsü sentonga tang anendaka aliba osang jangjaogo.

Ano külen, Cox kechi mechi tepset iba osang jangjashitsütsü asoshi police-ia bushisüngdang agitsü tenzüka lir.

“Cox tepsetba den sentakba bushisüngdang sentong ya tongti sentong ka lir. Cox kechi mechi tepset iba osang jangjashitsütsü asoshi police-i tenük kuli alir ajunga den ajurutepa osangtsüsang agiba densema, kanga sashia bushisüngdangtsü tenzüka lir,” ta West Yorkshire nung Investigation Officer, Dee Collins-ia osang jangjashitsü.

“Cox ajaki meima akümtsüboba yimsüsür ka liasü. La ama Parliament yimsüsür ka yimti yimdong nung tepsetba ya taoksatsü tatalokba ka lir,” ta Leicester nungi külem Labour Party MP, Keith Vaz-ia lemsatep.

“Cox sempet tajung alir yimsüsür ka liasü aser la asüba ajanga Britain parliament nem takoksa tulu bener arutsüogo,” ta shia, Britain Ato Kilonser, David Cameron-ia Gibraltar nung agitsü renemba lokti senden ka thinena liasü.