Brussels, June 28 (Agencies): Britain-i par tebilemba metetdaktsütsü takangba olen ka European Union (EU) lenirtemi tanü, Mongolbar nü metetdaktsüogo.
Britian-i EU toktsütsü lemtetba den sentakba rongdak senden ka Belgium yimtiba, Brussels nung tanü amendang EU lenirtemi par takhangbaji Britain Ato Kilonser, David Cameron den benoka liasü.
“EU aser Britain na tsüngda tesendaktep junga ayutsü imlar. Ajisüaka, Britain-i par tebilemba rakpoka lemsatepba sülen ang par linük den tesendaktep junga alitsü mesüra malitsü telemtetbaji asangsang nung agitettsü,” ta EU Commission Tir, Jean-Claude Juncker-ia metetdaktsü.
“EU-i terata tia nung mapang talangka alitsü memulunger. Anungji, Britain-i tekaratiba mapang nung EU asangsang nung toktsütsüla,” ta shia, EU linük lenirtemi Britain lenirtem den atsüka jurila senden mamentsü tayongzükba olen ka pai sangoktsü.
“Britain linüki EU den maneni tesendaktep junga ayutsü alizüng lir kechiyong EU nung züngsemba linüktemji ozü Britain kidangsüa aliba linüktem lir,” ta Cameron-ia tanü senden nung metetdaktsü.
Taoba mapang ama, EU den shishilembatsü aser tensa azüoktsü densema, sabang ajunga nung aroki amalitepa inyaktsü imlaba olen ka pai sangoktsü.
EU-i Lisbon Treaty kübok Arla 50 nung latetba nung ajemdaker Britain-i EU tekaratiba mapang nung EU toktsütsü metetdakja aka, par Britain-i EU tangtangbo metoktsütsü lemtetba osang ka Cameron-i tanü metetdaktsü.
Paisa ashiba agi, Britain-i EU toktsütsü maparenji pa melenzüka, Britain Ato Kilonser tasenba akümsangi ang mapa küma inyaktsü.
Britain-i EU toktsütsü lemtetba sülen Cameron-i Britain Ato Kilonser menden toktsütsü lemteta lir saka pai yimsüsü mendenji taküm September ita tashi abentsü.
You must be logged in to post a comment Login