Britain-i Syria kiralongrar anema raratsü mapang tongogo: Cameron

London, November 26 (Agencies): Britain Ato Kilonser, David Cameron-i par mitkar tayimtsü yoka Syria nung tentetba kiralongrar anema raradaktsütsü onük par parliament yimsüsürtem rong nung tanü Brehostibar nü benokogo.

Cameron-i taoba mapang, 2013 nunga par mitkar tayimtsü yoka Syria Tir, Bashar al-Assad-i aniba sorkar mitkartem anema raradaktsütsü onük benok saka par yimsüsürtemi iba onükji magizüki süidaktsü.

Syria nung tesep tentetba kiralongrar anema raratsü nungdak madoker ta Parliament’er Foreign Affairs Committee-ia tan November ita tetenzüklen metetdaktsü saka tawa Paris nung nisung 130 shi tepseta lendong atalokdaktsüba sülen Britain yimsüsürtem indang tangatetba melenshitsü tenzükba osang angazükogo.

“Syria nung adokba mangatettepbaren bentetba sülen ang par linük tentetba Islamic State (IS) densema kiralongrartem anema raratsü asoshi matatsüla,” ta Cameron-i tanü parliament senden nung sangoktsü.

“Kiralongrartemi asen Britain nung lendongtsüdong matalokdaktsütsü atema tanüngba alima linük mitkartem nem kiralongrartem makdoktsü khuret mebendaktsütsüla. Anungji, asen linükia asen mitkar tayimtsütem yoka alima teloktep mitkartem den yaritepa kiralongrar anema raratsü nungdaka kümogo,” ta pai ashi.

Ajisüaka, par Britain-i kiralongrartem anema raraba ajanga par linüki tarutsü anogotem nung kiralongrar den sentakba lendongtsüdong majurutsü ta Cameron-i shitetba ajanga dang par yimsüsürtemi Syria nung kiralongrartem anema raratsü onükji agizüktsü akok.

Russia-ia Syria nung tentetba kiralongrartem amaktsü tenzükba sülen kiralongrartemi Russia’er tayimtsü ka Egypt kübok Sinai peninsula nung tsükokdakja lendong atalokdaktsüba osang bushiteta lir.

Ano külen, “Syria asoshi yimtenren alizüng tajung ka meyui par linük tenteta kiralongrartem anema rara tenzükba ajanga Syria-i küm 4 shi tejaklen nungi tenzüka benshiba mangatettepbaren tang dang nungi tamajungba kümdaktsütsü akok,” ta Labour lenisang, Jeremy Corbyn-ia tanü metetdaktsü.