Britain linüki EU nung maneni züngsemtsü ajungshir: Obama

Windsor Castle kübok Oak room nung US Tir, Barack Obama aser kinüngtsü, Michelle Obama nati Britain chubatsür, Queen Elizabeth II (Abelen) aser Prince Phillip (Achijilen) na den ajurutepdang agiba noksa ka yangi angur. (London, April 22)

 London, April 22 (Agencies): Britain linüki European Union (EU) nung maneni züngsemtsü lemtettsü tajungshiba olen ka US Tir, Barack Obama-i tanü, Hokolbar nü metetdaktsüogo.

Obama-i Saudi Arabia linük semdanga par yimtiba, Riyadh nung amenba Gulf Cooperation Council (GCC) senden nung shilem agiba sülen yasüng, Brehositbar aonung London tonga ao aser pai iba olenji tanü sangoktsü.

Britain linük EU nung maneni züngsemtsü mesüra oda toktsütsü telemtetba agitsü asoshi par nüburtem rong nung taküm June ita 23 nü vote bendentsü sentong renema lir.

“Britain-i EU nung maneni züngsemtsü ajungshir kechiyong yamaji inyakba ajanga Britain linük tashi tuluba akümtsü. Ajisüaka, Britain maneni EU nung züngsemtsü telemtetbaji Britain nüburtemi ang tatem küma agitsü,” ta Obama-i metetdaktsü.

US aser Britain na tsüngda tesendaktep junga lir aser Britain-i EU nung züngsemba ajanga US-i Britain ajanga par tebilembatem linük 28 züngsemba EU nung lemsateptettsü ta tangatetba yua lir.

Ajisüaka, “US-i külem North American Free Trade Agreement agia alir Canada mesüra Mexico na nem par temzüng ozüng US lushi nung kodanga mamshidaktsütsü,” ta shia, London Mayor, Boris Johnson densema, Britain-i EU toktsütsü asoshi nokdakertemi Obama aitsüogo.

Obama-i tan London semdangdang, yashi arishi küm 90 tain akümla, Britain chubatsür, Queen Elizabeth den ajurutepba osanga jangjaogo.

Obama-i Britain Ato Kilonser, David Cameron dena ajurutepa, par linük anati aroki lungjemer Islamic State (IS) kiralongrar telok madak takok ngua raratsü, Middle East nung tensa tajungba kümdaktsütsü aser Europe-i ajurushia aliba refugee nisungtem den sentakba onüktem benoka liasü.