Britain mitkar züngsem 450 tashi Afghanistan nung ayutsü: Fallon

London, October 27 (Agencies): Britain-i par mitkar züngsem 450 tashi Afghanistan nung sangküm 2016 küm tatem tashi ayutsü lemtetba osang ka Britain defense secretary, Michael Fallon-i tanü Mongolbar nü metetdaktsüogo.

“Ozü mitkar züngsem 450 tashi Afghanistan nung maneni ayutsü lemtetogo. Ajisüaka, ozü mitkartemi tongpang raratsüren nung masü saka Afghan mitkartem nem tongpang raratsü terenemshiba agütsütsüren nung tongti shilem agitsü renemogo,” ta pai ashi.

Paisa ashiba agi, Afghanistan mitkartemi kiralongrar aser telungpurtem den rarabaren tendanga reprangshiba sülen par mitkartem sangküm, 2016 küma Afghanistan nung maneni yutsütsü telemtetbaji agi.

Afghan mitkar züngsemtem nem terenemshiba agütsütsü aser al-Qaeda telungpurtem meshimeshia samatsütsü nükjidong nung US mitkar züngsema 5,500 tashi 2017 küm tashi ayutsü lemtetba osang ka US Tir, Barack Obama-ia taoba September ita metetdakja lir.