Britain nüburtemi EU nung züngsemtsü telemtetba agitsü ajungshir: Cameron

London, June 21 (Agencies): Britain nüburtem talisa, tantsü tambotemi par Britain European Union (EU) nung maneni züngsemtsü telemtetba agitsü tajungshiba olen ka Britain Ato Kilonser, David Cameron-i tanü, Mongolbar nü metetdaktsüogo.
“Britain-i EU nung mezüngsemba ajanga tarutsü mapang nung Britain linüki tebang agi mejembitetba timtem aser tetsükdakba jenti ajurutsü,” ta shia, par Britain EU nung maneni züngsemtsü telemtetba agitsü asoshi Cameron-i par nüburtem ayongzüka liasü.
“Asen Britain EU nung maneni züngsemtsü mesüra EU toktsütsü telemtetba agitsüji asen nüburtem dak keta lir. Aseni tanü telemtetba agiba ajanga tarutsü putu nung alirtem asoshi jenjang tajungba mesüra tamajungba akümtsü. Anungji, nüburtemi kanga junga shisadanger, asen Britain maneni EU nung züngsemtsü telemtetba agitsü ajungshir,” ta London kübok Downing Street office kimalen osangbener den ajurutepdang Cameron-i metetdaktsü.
“Tarutsü putui aseni tanü agiba telemtetba memelenshitsütettsü kechiyong asenoki tanü EU nung mezüngsemtsü telemtetba agibaji tatemsüa telemtetba agir alitsü,” ta pai shisem.
Britain ajunga nung par Britain EU nung maneni züngsemtsü mesüra EU toktsütsü telemtetba agitsü asoshi vote agitsü anogo 2 anünga lir saka Britain nüburtem rong nung EU nung maneni züngsemtsü pusemer aser kasaji anemer tashi kasa ka aliba osang bushiteta lir.
“Tanü tashi nung Britain EU nung züngsemtsü pusemer nisung noklang nung shilem 53 shi aliba aser EU toktsütsü pusemertem shilem 46 shi aliba osang bushiteta lir,” ta Daily Telegraph osangkaket-ia metetdaktsü.
Britain-i tan telemtetba agiba ajanga EU aser West jenjang khen yongi balaka küma melenshitsütsüsa tang jenjang aliba osanga bushitetogo.
Ano külen, Britain-i linük 28 züngsemba EU toktsüba ajanga par yimtenren aser rongsenren jenjang mejungi akümtsü tekümdangtsü olen ka alima lenir, tongti shishilembar aser alima jenjang tendanger mongintemi metetdakja lir.