Britain nung oa tekolak atangtsü: Jihadi John

London, August 23 (Agencies): Islamic State telok nungi tekolak atanger, Jihadi John Britain-i meipa oa tekolak atangba mapa maneni inyaktsü, ta tan video tasen ka ajanga sangdongogo.
Iba video ya minute ka ser second 17 lir aser iba video ajanga Mohammed Emwazi, (Jihadi John), shibai Syria nung tang tashi nung Britain nunger ana dena nisung tenet tekolak tangogo, pai ano maneni iba kasa mapa inyaktsü ta metetdaktsü.
Arishi küm 27 tain, Emwazi-i par telok nung lenir den külemi Britain-i takok ngua meipa aotsü züngzükba, London Daily Mail osangkaket ajanga metetdaktsüogo.
Taküm January ita par teloki pua aliba Japan nunger Kenji Goto tekolak atangba video ka nung angüba sülen iba tekolak atangsangji London nungi aoba Mohammed Emwazi lir, ta February ita nungang jangja.
Western media temi Jihadi John tenüng jaloktsüsang, Emwazi British osü nung “Ni maneni tekolak atangtsü” ta ashiba kanga jangja angateter.
“Ni Mohammed Emwazi lir, ni memonui Britian-i aotsü…aser tekolak atang tenzüktsü,” ta Emwazi-i ashiba Free Syrian Army (FSA) ajanga metetdaktsü.
Yaküm August ita US journalist James Foley kolak atangba mapang nungi tang tashi nung IS-i sayaba video tenet tashi nung Emwazi adokogo. 2014 September ita nunga pai US journalist Steve Sotloff aser British aid worker, David Haines na tekolak atangba videoa ka sayaa liasü.