Britain nung Syria refugee meyirijang ishika jenokdaktsütsü: Cameron

Bicske, September 04 (Agencies): Britain nung Syria nunger refugee nisung meyirijang ishika jenokdaktsütsü lemtetba osang ka Britain Ato Kilonser, David Cameron-i tanü Hokolbar nü metetdaktsüogo.

Europe-i tang ajurua aliba bendangertem arua Europe nung jenokba khuret yaritepa abentsü tangatetba nung Britain-i par linük nung Syria nunger refugee nisungtemji jenoka lidaktsütsü lemteter lir.

Cameron-i Portugal linük semdanga par Ato Kilonser, Pedro Passos Coelho den tanü ajurutepdang iba olenji metetdaktsü.

“Syria nung tongpang kanga sashia raraba ajanga bener arutsüba lendong nungi taküm kümzüktsü nükjidong nung Syria toktsüba Syria nunger refugee nisung 5000 tashi ozü Britain nung jenokdaktsütsü asoshi mezüngbo renema. Ajisüaka, Europe-i bendangertem arua jenokba den sentakba timtem taoba mapang nungi tesashiba ajurutsü tenzükba ngua, ozü linük nunga Syria nunger refugee-tem timba jenokdaktsütsü lemtetshiogo,” ta Cameron-i ashi.

“Ozü sorkari refugee nisungtem jenokdaktsütsü telemtetbaji tatem küma agiba sülen ang refugee nisung kwi aser kechi tezüngzüktep agia ozü linük nung jenokdaktsütsü  iba osang tejangja taruba hopta alima dang sangoktsütsü renema lir,” ta pai shisem.

Ano, tang Europe tonga alir Syria nunger refugee nisungtem masü saka Middle East nung tentetba jenokdak balala nung jenoka alir Syria refugee nisungtem ang par linük jenokdaktsütsü sentong aliba osanga Cameron-i metetdaktsüogo.