Britain nungi osangbenertem White House-i maitdaktsü

Washington, January 28 (Agencies) : Britain nungi osangbenertemi, Britain Ato Kilonser Theresa May US Tir Donald Trump den senden amendang parnok White House-i meyitet mesüra menurang aitdaktsü, ta nemjema ashi.
Hokolbarnü Secret Service ketdangsertemi osangbenertem indang arishi kümtem nung security temi meputep kar puteta kanga mangmangtep, ta osang ajanga ashi.
UK nung date züludang tamasa anogo, iba sülen ita aser küm zülur saka US nungbo tamasa ita, iba sülen anogo aser küm zülur.
“British press corp. telok White House kima shidanga yutsü kechiba süra onoki agütsüba onok tasoba anogoji UK date züluyim nung liasü aser ibaji secret service temi mangatet,” ta Britain nungi osangbener, Jim Waterson-i tweet asü.
Pai, “Ita anogo 12 nü asortembo telungi idaktsü,” ta shisem.
Ato Kilonser May White House telungi ir külen US secret service-i Britain nungi aruba osangbenertem dang aitsü junger ta ashitsü atadang mapang tatsüka agi.
Mail On Sunday atema osangbener, Ned Donovan-i White House press ketdangser kati iba ama mangmangtepba atema khen menüdokdi ta shia liasü, ta ashi.
Pai, “White House press ketdangser jagi US aser UK na anogo züluyim balala asüba agi parnoki Britain nunger date züluyim memetetba atema khen menüdokdi ta kü dang phone shia liasü,” ta ashi.
Trump aser May na White House nung külemi jajadang Tiri tesendaktep balaka atema pelar aser Brexit ji junger asütsü ta ashiba osangkakettem nung shia lir.
US Tir-i, “May arua linük semdangba atema kanga pelar aser linük ana tsüngda tesendaktep tang tashi taitba kümogo,” ta White House nung senden amendang ashi.
England Chubatsüri Trump dang UK semdangtsü shiokba May-i US Tir nem metetdaktsü.
Jaokba ama US Tir aser First Lady nati taküm küm tatemlen UK semdangtsü agizükogo, ta May-i ashi.