Britain o Norway nati Syria nem teyari sen bn 2.9 agütsütsü nangzüker

(Abelen nungi achijileni tarensena) Norway Ato Kilonser, Erna Solberg; German Chancellor, Angela Merkel; Kuwait Emir, Sheikh Sabah al-Ahmad al-Sabah aser Britain Ato Kilonser, David Cameron nungeri anga alidang United Nations (UN) Secretary General, Ban Ki-moon (Achiji)-i Britain kübok London nung ayongba Donors Conference for Syria senden nung o jembiba noksa nung angur. (London, February 04)

London, February 04 (Agencies): Britain aser Norway sorkar nati timtem toushi jenti ajurua aliba Syria nüburtem yaritsü nükjidong nung teyari sen dollar sen million 2.9 2020 küm tashi nung agütsütsü tenangzükba ka tanü, Brehostibar nü metetdaktsüogo.

Syria nem teyari sen agütsütsü tenangzükbaji United Nations (UN)-i ayonger Britain kübok London nung tanü amenba Donors Conference for Syria senden nung metetdaktsü.

Taoba küm 5 tejaklen nungi tenzüka Syria nung mangatettep tulu adoka tongpang raraba ajanga timtem toushi jenti bener aruja alir Syria nüburtem yaritsü asoshi taküm, 2016 küm kisüng nung dollar sen billion 7 nungdakba osang ka United Nations (UN)-i metetdaktsüogo.

Britain aser Norway napronglai teyari sen billion 2.9 agütsütsü nangzükba sülena Syria nüburtem yaritsü asoshi maneni sen billion 1.2 nungdakba osang ka UN-i metetdaktsü.

Syria nung melitettsüsa küma Jordan, Lebanon aser Turkey densema bendanglen jenoka alir Syria refugee nisungtem yaritsü nükjidong nung alima linüktem sorkar aser nuburtem yaritsü asoshi tentetba tentet balala nungi lenirtemi tanü senden nung shilem agia liasü.

“Syria nuburtemi pei taküm samatsü metsüboi timtem toushi jenti ajangshia Europe nung jenoktsü memerangi pei linük nung taküm junga litettsü teimla agütsütsü nükjidong nung parnok yaritsü nangzükogo,” ta Britain Ato Kilonser, David Cameron-ia tanü senden nung metetdaktsü.